मुंबई : मुंबई महानगर प्रदेशाची अर्थव्यवस्था 2030 पर्यंत 140 अब्ज डॉलरवरून 300 अब्ज डॉलरवर नेण्याचे उद्दिष्ट असून यासाठी वडाळा येथे जागतिक दर्जाचे स्टार्ट- अप आणि इनोव्हेशन हब स्थापन करण्यात येणार असून त्यासाठी 130 एकर जमिनीचे वाटप करण्यात आले असल्याचे मुख्यमंत्री देवेंद्र फडणवीस यांनी अर्थसंकल्प मांडताना सांगितले.
शाश्वत शहरी विकासासाठी 10 हून अधिक सक्षम प्रादेशिक विकास प्राधिकरणे, 50 हून अधिक सुनियोजित, बहुपयोगी शहरी समूह विकसित करण्यात येणार आहेत. शहरी स्थानिक स्वराज्य संस्थांच्या सेवा 100 टक्के डिजिटाईज करणार असल्याचे फडणवीस यांनी अर्थसंकल्पीय भाषणात सांगितले.
अटल बिहारी वाजपेयी शिवडी न्हावा शेवा अटल सेतू परिसरात तिसरी मुंबई विकसित करण्यात येईल. याबरोबर पालघरजवळ वाढवण येथे चौथी मुंबई विकसित करण्यात येणार आहे. या भागात लॉजिस्टिक आणि वेअर हाऊसिंगसाठी विकास केंद्र निर्माण करण्यात येतील, असे मुख्यमंत्री फडणवीस यांनी सांगितले.
मुंबई महानगर प्रदेशात 20 लाख झोपडपट्टी धारकांच्या घरांच्या पुनर्विकासासाठी घरांचे प्रकल्प उभारले जातील. 10 लाख परवडणारी घरेही बांधली जातील. मुंबई महानगर प्रदेशात नवीन झोपडपट्टी होणार नाही, बेकायदेशीर बांधकामे होणार नाहीत यासाठी ‘नो न्यू स्लम फ्रेमवर्क’ प्रणाली विकसित करण्यात येईल.
