मुंबई : भुयारी मेट्रोकडे जास्तीत जास्त प्रवाशांना वळवण्यासाठी विविध उपाययोजना केल्या जात आहेत. याचाच एक भाग म्हणून मेट्रो स्थानकांबाहेर आता रिक्षा सेवा उपलब्ध करून दिली जात आहे. आधीच बुकींग करून किंवा न करताही प्रवाशांना रिक्षा पकडता येईल.
गेल्या वर्षी ऑक्टोबरमध्ये भुयारी मेट्रो स्थानकांबाहेर फीडर बससेवा सुरू करण्यात आली. वांद्रे-कुर्ला संकुल, वरळी आणि छत्रपती शिवाजी महाराज टर्मिनस या प्रमुख स्थानकांबाहेर सिटीफ्लो या खासगी कंपनीच्या बस प्रवाशांना उपलब्ध करून देण्यात आल्या आहेत. बीकेसी मेट्रो स्थानकावरून निघणारी बस एनएसई, जिओ गार्डन, वन बीकेसी आणि कौटुंबिक न्यायालय यांसारख्या प्रमुख ठिकाणांवरून जाते.
वरळी येथील बससेवा सेंच्युरी मिल्स, वन इंडिया बुल्स सेंटर, कमला मिल्स आणि पेनिन्सुला कॉर्पोरेट पार्क या ठिकाणी तर सीएसएमटी येथून जाणारी बस ओल्ड कस्टम हाऊस, लायन्स गेट, एस.पी. मुखर्जी चौक, के.सी. कॉलेज आणि चर्चगेट मेट्रो स्थानक येथे जाते. तसेच काही मेट्रो स्थानकांबाहेर उबेर या खासगी कंपनीची टॅक्सीसेवा उपलब्ध करून देण्यात आली आहे.
