मुंबई: द्रोणाचार्य पुरस्कार प्राप्त गणेश देवरुखकर या मल्लखांब प्रशिक्षकावर अल्पवयीन मुलीशी अश्लील लगट करुन तिचा विनयभंग केल्याप्रकरणी विलेपार्ले पोलिसांनी पोक्सो कलमांतर्गत गुन्हा दाखल केला आहे.
याच गुन्ह्यांत चौकशी करुन देवरुखकरला नोटीस देऊन सोडून देण्यात आले. या वृत्ताला वरिष्ठ पोलीस निरीक्षक प्रिया थोरात यांनी दुजोरा दिला आहे. सोळा वर्षीय पीडित मुलगी विलेपार्ले येथे तिच्या कुटुंबियांसोबत राहत असून सध्या शिक्षण घेत आहे. विलेपार्ले येथील पार्लेश्वर व्यायामशाळेत ती नियमित जिम्नॅस्टिकसाठी जात होती. तिथेच गणेश देवरुखकर प्रशिक्षक म्हणून काम करत होता.
२१ ऑगस्टला रात्री साडेदहा ते अकराच्या सुमारास गणेश देवरुखकर यांनी या मुलीला मेसेज करून जिममध्ये बोलाविले होते. ती जिममध्ये गेल्यानंतर देवरूखकर याने जिमला आतून कडी लावून तिच्याशी जवळीक साधून तिच्याशी अश्लील लगट करण्याचा प्रयत्न केला. या प्रकाराने ती प्रचंड घाबरली आणि घरी जाण्यासाठी निघाली. यावेळी त्याने तिला घडलेला कोणालाही सांगू नकोस असे सांगितले.
घरी आल्यानंतर तिने तिच्या पालकांना हा प्रकार सांगितला. ही माहिती ऐकून त्यांना धक्का बसला. त्यानंतर त्यांनी गणेश देवरुखकरविरुद्ध विलेपार्ले पोलीस ठाण्यात तक्रार केली होती. या तक्रारीची पोलिसांनी दखल घेत त्याच्याविरुद्ध विनयभंगासह पोक्सोचा गुन्हा दाखल केला.
त्यानंतर त्याला चौकशीसाठी पोलीस ठाण्यात बोलाविण्यात आले. या गुन्ह्यांत सात वर्षांपेक्षा कमी शिक्षा असल्याने त्याला चौकशीनंतर नोटीस देऊन सोडून देण्यात आल्याचे वरिष्ठ पोलीस निरीक्षक प्रिया थोरात यांनी सांगितले.
