मुंबई: परदेशी नागरिकांना आकर्षक ऑफर देऊन त्यांची लूट करणाऱ्या आंतरराज्यीय टोळीचा भांडाफोड मुलुंड पोलिसांनी केला आहे. ही टोळी परदेशातील नागरिकांना त्वरित लोन मिळवून देण्याच्या नावाखाली फसवत होती. मिळालेल्या माहितीनुसार, मुलुंडमधील कॉलनी परिसरात या टोळीने एक बनावट कॉल सेंटर सुरू केले होते. येथून ते अमेरिका आणि कॅनडा येथील नागरिकांना फोन करून ‘इंटरनॅशनल लोन सर्व्हिस’च्या नावाखाली संपर्क साधत होते.
आकर्षक व्याजदर आणि झटपट लोन मिळवून देण्याचे आमिष दाखवून ही टोळी संबंधित नागरिकांकडून ‘प्रोसेसिंग फी’ आकारत असे. परंतु ही फी रुपये किंवा डॉलर्समध्ये नव्हे, तर नामांकित स्टोअर्सच्या गिफ्ट व्हाउचरच्या माध्यमातून घेतली जात होती.
एकदा एखादा ग्राहक त्यांच्या जाळ्यात अडकला की, त्याच्याकडून मिळालेले गिफ्ट व्हाउचर तात्काळ सुरत येथील प्रशांत राजपूत या मुख्य सूत्रधाराकडे पाठवले जायचे. या पद्धतीने टोळीने हजारो डॉलर मूल्याचे गिफ्ट कार्ड्स मिळवून परदेशी नागरिकांना मोठ्या प्रमाणावर फसवल्याचा संशय आहे.
मुलुंड पोलिसांना या संदर्भात मिळालेल्या गुप्त माहितीच्या आधारे त्यांनी कॉलनी परिसरातील त्या कॉल सेंटरवर छापा टाकला. या कारवाईत सागर गुप्ता, अभिषेक सिंह, तनय धडसिंग, शैलेश शेट्टी आणि रोहन अन्सारी या पाच आरोपींना अटक करण्यात आली आहे.
या सर्वांकडून लॅपटॉप, मोबाइल फोन, संगणक यासह विविध पुरावे जप्त करण्यात आले आहेत. दरम्यान, या रॅकेटचा मुख्य सूत्रधार मानला जाणारा सुरतचा प्रशांत राजपूत मात्र अद्याप फरार असून पोलिस त्याचा शोध घेत आहेत.
मुलुंड पोलिस उपनिरीक्षक अजय जोशी यांनी सांगितले की, “ही टोळी व्यवस्थित कॉल सेंटरप्रमाणे काम करत होती. त्यांच्याकडे परदेशातील नागरिकांचा डेटाबेस होता. ते बनावट वेबसाईट आणि मेलद्वारे संपर्क करून फसवणूक करत. या प्रकरणात आणखी काही जण सामील असल्याची शक्यता आहे.”
या प्रकरणामुळे सायबर गुन्ह्यांबाबत पुन्हा एकदा सजगतेची गरज अधोरेखित झाली आहे. पोलिसांनी नागरिकांना सतर्क राहण्याचे आणि परदेशातील कोणत्याही अनोळखी क्रमांकावरून येणाऱ्या लोन किंवा गिफ्ट ऑफरवर विश्वास न ठेवण्याचे आवाहन केले आहे.
