मुंबई: विधान परिषदेच्या स्थानिक स्वराज्य संस्था मतदारसंघाच्या ११ जागांसाठी आज, १८ जून रोजी मतदान होणार आहे. एकूण १७ जागांपैकी ६ जागांवर महायुतीचे उमेदवार यापूर्वीच बिनविरोध विजयी झाले असून, उर्वरित ११ जागांवर ही निवडणूक होत आहे. सकाळी ९ ते दुपारी ४ वाजेपर्यंत मतदानाची वेळ आहे. तर, मतमोजणी २२ जून रोजी होणार आहे.
महानगरपालिका, नगरपालिका, जिल्हा परिषद सदस्य आदी स्थानिक स्वराज्य संस्थांमधील लोकप्रतिनीधी मतपत्रिकेद्वारे मतदान करतील.
सिंधुदुर्ग-रत्नागिरी-रायगड स्थानिक प्राधिकारी मतदारसंघातून राष्ट्रवादी काँग्रेस पक्षाचे अनिकेत तटकरे, ठाण्यातून शिवसेनेचे रविंद्र फाटक, पुणे मतदारसंघातून राष्ट्रवादी काँग्रेस पक्षाचे विक्रम काकडे, वर्धा-चंद्रपूर-गडचिरोली मतदारसंघातून भाजपचे अरुण लखानी, अहिल्यानगर मतदारसंघातून भाजपचे प्राजक्त तनपुरे, यवतमाळ मतदारसंघातून शिवसेनेचे दुष्यंत चतुर्वेदी आदी महायुतीचे सहाही उमेदवार बिनविरोध निवडून आले.
गुरुवारी सोलापूर, जळगाव, सांगली-सातारा, नांदेड, नागपूर, भंडारा-गोंदिया, नाशिक, अमरावती, धाराशिव-लातूर-बीड, परभणी-हिंगोली आणि छत्रपती संभाजीनगर-जालना या ११ मतदारसंघांमध्ये मतदान होईल.
