मुंबई: अन्न व औषध प्रशासनाने राज्यभर धडक कारवाई करत प्रतिबंधित पानमसाला, गुटखा आणि अन्य अन्नपदार्थांचा मोठा साठा जप्त केला आहे. १४ जुलै ते १७ ऑगस्ट या कालावधीत झालेल्या कारवाईत एकूण १ कोटी ७ लाख ६१ हजार ९४४ रुपये किमतीचा माल जप्त करण्यात आला.
प्रतिबंधित अन्नपदार्थांच्या विक्री, वितरण आणि वाहतुकीप्रकरणी सात एफआयआर दाखल करून दहा जणांना अटक करण्यात आली आहे. तसेच आठ अन्न आस्थापनांचे परवाने निलंबित करण्यात आले आहेत.
राज्यव्यापी विशेष तपासणी मोहिमेत दूध व दुग्धजन्य पदार्थांसह बेकरी पदार्थ, खाद्यतेल आणि अन्य अन्नपदार्थांची तपासणी करण्यात आली. दूध व दुग्धजन्य पदार्थांच्या तपासणीत पालघरच्या चारोटी टोलनाक्यावर अस्वच्छ आणि अयोग्य तापमानात वाहतूक केला जाणारा २ लाख १२ हजार २०० रुपये किमतीचा कोलोस्ट्रमचा साठा जप्त करण्यात आला.
गुटख्यावर सर्वाधिक कारवाई
प्रतिबंधित पानमसाला, गुटखा, सुगंधित तंबाखू आदींच्या विक्री, साठवणूक आणि वाहतुकीविरोधात कोकण, पुणे, नाशिक आणि नागपूर विभागात कारवाई करण्यात आली
६५ हॉटेल-रेस्टॉरंटची तपासणी
राज्यभरातील ६५ हॉटेल, रेस्टॉरंट, ढाबे आणि अन्य अन्न आस्थापनांची तपासणी करण्यात आली.
