BJP Municipal Election: महापालिका निवडणुकांसाठी भाजपचा प्रचाराचा मेगाप्लॅन
मुंबई : मुंबईसह राज्यातील महानगरपालिकांच्या प्रचारासाठी भाजपने मेगाप्लॅन आखला आहे. मुख्यमंत्री देवेंद्र फडणवीस यांच्या राज्यभरात 40 ते 45 सभांचे नियोजन करण्यात आले असून, मुंबई महानगर क्षेत्रातील महापालिकांसाठी 11, 12 आणि 13 जानेवारी रोजी देशभरातून प्रचारकांची फौज उतरविण्यात येणार आहे. यामध्ये पंतप्रधान नरेंद्र मोदी, केंद्रीय गृहमंत्री अमित शहा यांच्यासह स्टार प्रचारकांचा समावेश आहे.
मुंबई महानगर क्षेत्रात मुंबईसह ठाणे, नवी मुंबई, मीरा-भाईंदर, कल्याण-डोंबिवली या प्रमुख शहरांतील प्रचारासाठी देशभरातील प्रचारकांना उतरविण्याचे भाजपचे नियोजन आहे. विशेष म्हणजे, पंतप्रधान नरेंद्र मोदी, केंद्रीय गृहमंत्री अमित शहा यांच्यासह भाजपच्या इतर राज्यांतील मुख्यमंत्री आणि स्टार प्रचारकांचा यात समावेश करण्यात आला आहे. सूत्रांच्या माहितीनुसार, पंतप्रधान मोदी 11 जानेवारीला मुंबईत दाखल होणार असून, त्यांच्या हस्ते ‘पद्मभूषण’ पुरस्कारप्राप्त आचार्य श्री रत्नसुंदरसुरीश्वरजी महाराज यांनी लिहिलेल्या 500 व्या पुस्तकाचे प्रकाशन होणार आहे. या कार्यक्रमाच्या निमित्ताने जैन मतदारांमध्ये योग्य तो संदेश जाईल, असा भाजपचा तर्क आहे.
एकूण मतदारांतील उत्तर भारतीयांची संख्या लक्षात घेऊन उत्तर प्रदेशचे मुख्यमंत्री योगी आदित्यनाथ यांच्यासह भोजपुरी अभिनेते मनोज तिवारी, रवी किशन, मैथिली ठाकूर, गायक निरहुआ यासारख्या स्टार प्रचारकांना पाचारण करण्यात येईल.
मुख्यमंत्र्यांच्या सभांचा धडाका
मुख्यमंत्री देवेंद्र फडणवीस हे आगामी 10 दिवसांत तब्बल 40 ते 45 प्रचार सभा घेणार आहेत. दिवसाला सरासरी 4 सभांचे उद्दिष्ट ठेवण्यात आले असून, यामुळे प्रचाराला प्रचंड वेग येणार आहे. यापूर्वी स्थानिक स्वराज्य संस्थांच्या निवडणुकांमध्येही मुख्यमंत्र्यांनी सभांचा धडाका लावला होता. मुंबई, पुणे, पिंपरी-चिंचवड, ठाणे, नवी मुंबई, नाशिक, नागपूर, छत्रपती संभाजीनगर अशा मोठ्या महापालिकांमध्ये मुख्यमंत्री फडणवीस यांच्या किमान तीन ते चार सभांचे आयोजन केले जाणार आहे. छोट्या महापालिका क्षेत्रांमध्ये प्रत्येकी एक सभा होईल.
