मुंबई: नगरविकास, सामाजिक न्याय तसेच इतर विभागांकडून विविध कामे मिळवून देण्याचे आमिष दाखवून एका ठगाने सातजणांची सुमारे 91 लाखांची फसवणूक केल्याचा प्रकार उघडकीस आला आहे. याप्रकरणी सतीश कदम या ठगाविरुद्ध मरिनड्राईव्ह पोलिसांनी गुन्हा नोंदवून तपास सुरु केला आहे. आरोपी सतीश हा मूळचा नांदेडचा रहिवाशी असल्याचे पोलिसांनी सांगितले.
हनुमंत बडजे हे तक्रारदार असून त्यांची 2024 रोजी सतीश कदमशी ओळख झाली होती. त्याने त्यांना त्याची मंत्रालयात चांगली ओळख असल्याची बतावणी केली होती. त्यांना नगरविकास, सामाजिक न्याय तसेच इतर विभागांतील सरकारी कामे मिळवून देण्याचे आमिष त्याने दाखविले होते.
याच कामासाठी त्याने त्यांच्याकडून पैसे घेतले होते. मात्र दिलेल्या मुदतीत त्याने त्यांना कुठलेही सरकारी काम मिळवून दिले नाही. त्याच्याकडून फसवणूक होत असल्याचे लक्षात येताच त्यांनी त्याच्याकडे त्यांच्या पैशांची मागणी सुरु केली. यावेळी त्याने त्यांना धनादेश दिले, मात्र ते धनादेश बँकेत न वटता परत आले.
या घटनेनंतर त्यांनी मरिनड्राईव्ह पोलीस ठाण्यात धाव घेऊन सतीश कदमविरुद्ध तक्रार केली. या तक्रारीची शहानिशा केल्यानंतर त्याच्याविरुद्ध पोलिसांनी अपहारासह फसवणुकीचा गुन्हा दाखल केला असून अधिक तपास सुरू आहे.
चौकशीदरम्यान, सतीश कदमने अशाच प्रकारे इतर काही लोकांनाही विविध सरकारी कामे मिळवून देण्याचे आमिष दाखवून त्यांच्याकडून पैसे घेतल्याचे समोर आले. मात्र त्यापैकी कोणालाही काम दिले नव्हते. 2024 ते 2026 या कालावधीत त्याने तक्रारदारासह सातजणांकडून टप्याटप्याने 91 लाख रुपये घेतले होते.
