मुंबई : अनुसूचित जमाती कल्याण समितीच्या नियोजित बैठकीस गैरहजर राहिल्याबद्दल मुंबई महापालिका आयुक्त भूषण गगराणी यांच्या विरोधात हक्कभंगाची सूचना देण्यात आली आहे. तर, यासंदर्भात पालिका आयुक्तांचा खुलासा आला असून पुढील कार्यवाहीसाठी हे प्रकरण विशेष हक्क समितीकडे पाठविण्याबाबत योग्य तो निर्णय घेऊ, असे सांगून विधानसभा अध्यक्षांनी हक्कभंग सूचनेवरील आपला निर्णय राखून ठेवला.
विधानसभेत मंगळवारी भाजप आमदार राजू तोडसाम यांनी अनुसूचित जमाती कल्याण समितीचा पहिला अहवाल सादर केला. मात्र, विधानसभा आणि विधान परिषदेतील आमदारांची ही समिती 4 नोव्हेंबर 2025 रोजी नियोजित बैठकीसाठी मुंबई महापालिकेच्या दौऱ्यावर होती.
बैठकीची पूर्वसूचना दिलेली असतानाही पालिका आयुक्त गगराणी हे आपल्या दालनात असूनही समितीच्या नियोजित बैठकीस गैरहजर राहिले. तसेच, राजशिष्टाचारानुसार त्यांनी समितीचे स्वागतही केले नाही. आदिवासी समाजाच्या प्रश्नांसाठी कार्यरत समितीसोबत त्यांचे हे वर्तन अत्यंत खेदजनक असून त्यांच्या कृतीने आदिवासी समाजासह विधिमंडळाचा अवमान झाला आहे. त्यामुळे अनुसूचित जमाती कल्याण समितीच्या सर्व सदस्यांनी महापालिकेचे आयुक्त भूषण गगराणी यांच्याविरुद्ध हक्कभंगाची सूचना दिली होती. त्यामुळे हा विषय विशेष हक्क समितीकडे पाठविण्याची मागणी तोडसाम यांनी अहवाल सादर करताना केली.
त्यावर, या हक्कभंगाच्या प्रस्तावासंदर्भात विभागाने गगराणी यांच्याकडे मागविलेला खुलासा आलेला आहे. त्यामुळे पुढील कारवाईसाठी हे प्रकरण विशेष हक्क समितीकडे पाठविण्याबाबत योग्य तो निर्णय घेऊ, असे सांगत विधानसभा अध्यक्ष नार्वेकर यांनी यावरील आपला निर्णय राखून ठेवला.
