मुंबई: पेन्शनमध्ये सुधारणा, निवृत्ती वेतनधारकांसाठी महागाई भत्त्याचे एकसमान सूत्र, राष्ट्रीय पेन्शन प्रणालीऐवजी जुनी पेन्शन योजना पुन्हा सुरू करावी यासह इतर मागण्यांसाठी बँक कर्मचाऱ्यांनी २८ ते ३० सप्टेंबरदरम्यान संपाची हाक दिली आहे.
त्याआधी शनिवार आणि रविवारच्या सुट्ट्या आहेत. त्यामुळे २६ सप्टेंबर ते ३० सप्टेंबरदरम्यान सलग पाच दिवस बँकिंग सेवा बंद राहणार आहेत.
बँक अधिकारी आणि कर्मचाऱ्यांच्या जवळपास ९० टक्के सदस्यांचे प्रतिनिधित्व करणाऱ्या सात युनियनची प्रमुख संघटना असलेल्या ‘युनायटेड फोरम ऑफ बँक युनियन्स’ने संपाची हाक दिली आहे.
२०२४ च्या वेतन करारापासून प्रलंबित असलेला पाच दिवसांचा कामाचा आठवडा तत्काळ लागू करावा, अशी युनियनची मुख्य मागणी आहे. याशिवाय, कामगिरीवर आधारित प्रोत्साहन भत्त्यात एकतर्फी बदल करण्यात आल्याचा आरोप करत त्यात सुधारणा करण्याची मागणी आहे.
