मुंबई : सुमारे सतरा लाखांच्या महागड्या वॉर्चेसची चोरी केल्याप्रकरणी एका खाजगी कंपनीच्या कर्मचाऱ्याला एमआयडीसी पोलिसांनी अटक केली. सुमीत अमरजीत कुर्मी असे या आरोपी कर्मचाऱ्याचे नाव असून त्याच्याकडून चोरीचा बहुतांश मुद्देमाल पोलिसांनी हस्तगत केल्याचे वरिष्ठ पोलीस निरीक्षक रविंद्र वाणी यांनी सांगितले. काम करताना त्याने टप्प्याटप्प्याने हातसफाई हातसफाई केल्याचे तपासात उघडकीस आले आहे.
28 वर्षांची तक्रारदार महिला ठाण्यातील रहिवाशी आहे. सध्या ती अंधेरीतील एका खाजगी कंपनीत एचआर म्हणून कामाला आहे. ही कंपनी वॉर्चेस ॲक्सेसरीज, स्मॉल लेदर गुड्स आदीचे ट्रेडिंग आणि डिस्ट्रीब्युशनचा व्यवसाय करते. कंपनीत 53 कर्मचारी असून त्यात सुमीत कुर्मीचा समावेश ाहे. त्याच्यावर टॅग प्रिटींग आणि इन्वेंट्री रुममधील मालाची ने-आण करण्याची जबाबदारी होती.
22 नोव्हेंबर 2025 रोजी दुपारी त्यांनी वॉर्चेस ॲक्सेसरीज, स्मॉल लेदर गुड्स असा मुद्देमाल इन्वेंट्री रुममध्ये ठेवला होता. 20 जानेवारीला तेथून काही वॉर्चेस आणण्यासाठी दोन महिला कर्मचारी गेल्या होत्या. यावेळी त्यांना इन्वेंट्री रुममध्ये काही वॉर्चेस मिसिंग असल्याचे दिसून आले. यावेळी रुमच्या सर्व वॉर्चेसची तपासणी करण्यात आली होती. या तपासणीत विविध 16 लाख 74 हजार 534 रुपयांचे 36 वॉर्चेस चोरीस गेल्याचे दिसून आले होते. त्यामुळे ती माहिती कंपनीच्या मालकाला देण्यात आली होती. त्यांनी या संपूर्ण प्रकरणाची चौकशीसह सीसीटिव्ही फुटेजची पाहणी करण्याचे आदेश दिले होते.
या घटनेनंतर त्यांनी सुमीत कुर्मी याच्या हालचालीवर लक्ष ठेवले होते. यावेळी सुमीत हा त्याच्या पॅण्टच्या खिशातून वॉर्चेस घेऊन जात असल्याचे दिसून आले. हा संपूर्ण प्रकार सीसीटिव्ही फुटेजमध्ये स्पष्टपणे दिसून आला. या प्रकारानंतर त्याची तक्रारदार महिलेने चौकशी केली. यावेळी त्याने वॉर्चेस चोरी केल्याची कबुली दिली. याप्रकरणी अटक केल्यानंतर त्याला अंधेरीतील स्थानिक न्यायालयाने पोलीस कोठडी सुनावली आहे.
