मुंबई: महाराष्ट्र नवनिर्माण विद्यार्थी सेनेच्या वतीने 'बोलक्या रेषा' या व्यंगचित्र प्रदर्शनाचे आयोजन करण्यात आले होते. या कार्यक्रमाच्या समारोपाला मनसे नेते अमित ठाकरे प्रमुख पाहुणे म्हणून उपस्थित होते. यावेळी त्यांनी वडिल मनसे प्रमुख राज ठाकरे यांच्या शिकवणीतील सल्ला मुलांना दिला. तसेच व्यंगचित्रांबाबत त्यांचे मत देखील व्यक्त केले.
मनसे आयोजित 'बोलक्या रेषा' कार्यक्रमाच्या समारोपात बोलताना अमित ठाकरे म्हणाले की, "आज मला एवढं वाईट वाटते की, माझ्या वडिलांनी जो मला सल्ला दिला होता. तो जर मी ऐकला असता तर आज माझं देखील एक व्यंगचित्र इथ दिसलं असतं. त्यांनी मला लहानपणी एकच सल्ला दिला होता की, "काहीही कर पण दिवसातून एकदा चित्र काढत जा, पण मी तो ऐकला नाही", अशी मनातील खदखद महाराष्ट्र नवनिर्माण विद्यार्थी सेनेचे अध्यक्ष अमित ठाकरे यांनी बोलून दाखवली.
यावेळी अमित ठाकरे म्हणाले की, "व्यंगचित्राची कला ही तुम्हाला कोणी शिकू देत नाही ही कला तुमच्या आत असते किंवा नसते. माझे अनेक मित्र आहेत, ज्यांनी ड्रॉईंग शिकले व्यंगचित्र शिकायचा प्रयत्न देखील केला. पण त्यांना एक साधी रेषा देखील काढता येत नाही. आज याठिकाणी लहान मुलांचं व्यंगचित्र पाहून मला खूपच आनंद झाला आहे. तुमच्या हातातील ही कला आहे. त्याच्याकडे दुर्लक्ष करू नका, तर ती जोपासा. मला माझ्या लहानपणी माझ्या वडिलांनी जो सल्ला दिला होता तोच मी तुम्हाला देऊ इच्छितो. की, तुम्ही तुमच्या आयुष्यात कितीही व्यस्त झाला तर, एक तास हा व्यंगचित्राला देत जा, असा सल्ला यावेळी अमित ठाकरे यांनी उपस्थित मुलांना दिला.
