Purna Cannabis Cultivation
पूर्णा : पूर्णा तालुक्यातील आव्हई शिवारात हळद व कापूस पिकात आंतरपीक म्हणून विनापरवाना गांजाची लागवड केल्याचे उघडकीस आले आहे. स्थानिक गुन्हे शाखा आणि पूर्णा पोलिसांच्या संयुक्त पथकाने बुधवारी रात्री साडेआठच्या सुमारास गुप्त माहितीच्या आधारे छापा टाकून सुमारे ५ लाख ३ हजार रुपये किमतीची गांजाची झाडे जप्त केली.
या कारवाईत काशिनाथ पांडुरंग पवार आणि व्यंकटी बाजीराव पवार (दोघेही रा. आव्हई, ता. पूर्णा, जि. परभणी) यांनी आपल्या शेतात विक्रीच्या उद्देशाने गांजाची लागवड केल्याचे पोलिसांच्या निदर्शनास आले. पथकाने तलाठ्यांच्या मदतीने संबंधित शेताची पाहणी केली असता हळद व कापूस पिकामध्ये हिरवीगार गांजाची झाडे वाढलेली आढळून आली.
राजपत्रित अधिकारी आणि दोन पंचांच्या उपस्थितीत ही गांजाची झाडे उपटून त्यांचे वजन करण्यात आले. काशिनाथ पवार यांच्या शेतातून ७.७६० किलो वजनाची गांजाची झाडे जप्त करण्यात आली. त्यांची किंमत ३ लाख ८८ हजार रुपये असल्याचे पोलिसांनी सांगितले. तर व्यंकटी पवार यांच्या शेतातून २.३०० किलो वजनाची गांजाची झाडे आढळून आली. त्यांची किंमत १ लाख १५ हजार रुपये आहे. दोन्ही ठिकाणांहून एकूण १०.०६० किलो गांजाची झाडे जप्त करण्यात आली असून त्यांची एकूण किंमत ५ लाख ३ हजार रुपये आहे.
कारवाईदरम्यान दोन्ही संशयित आरोपींचा शोध घेण्यात आला; मात्र ते पोलिसांना मिळून आले नाहीत. याप्रकरणी स्थानिक गुन्हे शाखा, परभणी पथकातील पोलिस हवालदार देविदास दशरथ बुकरे यांच्या फिर्यादीवरून पूर्णा पोलिस ठाण्यात गुन्हा दाखल करण्यात आला आहे.
काशिनाथ पांडुरंग पवार आणि व्यंकटी बाजीराव पवार यांच्याविरोधात गुन्हा दाखल करण्यात आला आहे. पोलिस निरीक्षक सचिन बेंद्रे यांच्या आदेशानुसार ही कारवाई करण्यात आली. पुढील तपास पोलिस उपनिरीक्षक किरकन करीत आहेत.
दरम्यान, आव्हई परिसरात यापूर्वीही बेकायदा गांजा लागवडीविरोधात पोलिसांनी कारवाई केली आहे. ताज्या कारवाईमुळे परिसरात विनापरवाना गांजाची लागवड करणाऱ्यांमध्ये खळबळ उडाली आहे.
