One and a half years of hard labor for molesting a woman
मानवत, पुढारी वृत्तसेवा येथील प्रथमवर्ग न्या.पी.सी. फाटले यांच्या न्यायालयाने महिलेच्या विनयभंग, लैंगिक छळ, शिवीगाळ व धमकी प्रकरणात कृष्णा काळे रा. सावळी ता.मानवत याला दोषी ठरवत दीड वर्षाच्या सक्तमजुरीची शिक्षा सुनावली.
३ जानेवारी २०२४ रोजी दुपारी कापूस वेचताना पीडित महिलेशी आरोपीने गैरवर्तन केले. मानेवर पकड घेऊन खाली पाडणे, अश्लील मागणी करणे तसेच घटनेची माहिती दिल्यास जीवे मारण्याची धमकी देणे असे गंभीर प्रकार केले. यात मानवत पोलिसांत गुन्हा दाखल होता. तपासादरम्यान साक्षीदारांचे जबाव, पंचनामा व इतर पुरावे सादर केले.
सुनावणीदरम्यान आरोपीने राजकीय वैमनस्यातून खोटा गुन्हा लावल्याचा दावा केला, मात्र न्यायालयाने तो फेटाळला. न्यायालयाने पीडित महिलेची साक्ष विश्वासार्ह मानत आरोपीस कलम ३५४ अंतर्गत दीड वर्षांची सक्तमजुरी व दंड, तसेच इतर कलमांखाली प्रत्येकी एक वर्षाची सक्तमजुरी व दंड अशी शिक्षा सुनावली. सर्व शिक्षा एकत्रित भोगायच्या आहेत.
आरोपीने पीडितेला १५ हजारांची भरपाई देण्याचे आदेश दिले. महिलां विरुध्द वाढत्या गुन्ह्यांच्या पार्श्वभूमीवर अशा प्रकरणात कठोर शिक्षा देणे आवश्यक असल्याचे नमूद केले. सरकार पक्षातर्फे अॅड.पी.एम. लिहिने यांनी काम पाहिले, त्यांना अॅड. मुकुंद पाटील यांनी सहकार्य केले.
