Nanded Triple Murder: नांदेड शहरात मध्यरात्री भीषण हाणामारीची घटना घडून तिघांचा मृत्यू झाल्याने खळबळ उडाली आहे. डी-मार्ट परिसरातील कॅनाल रोडवर पहाटे अंदाजे 2 वाजण्याच्या सुमारास हा प्रकार घडला. या घटनेमुळे परिसरात भीतीचे वातावरण पसरले असून गँगवॉर असल्याची चर्चा रंगली आहे.
मिळालेल्या प्राथमिक माहितीनुसार, काही जणांमध्ये झालेल्या वादातून ही हाणामारी झाली. वाद इतका वाढला की त्याचे रूपांतर थेट हिंसाचारात झाले.
या हाणामारीत धारदार शस्त्रांचा वापर झाल्याची शक्यता व्यक्त केली जात आहे. घटनास्थळी मोठ्या प्रमाणात रक्त सांडल्याचेही सांगितले जात आहे.
या घटनेत अर्जित सिंग उर्फ अजय चव्हाण, शहाबाज आणि अरबाज यांचा मृत्यू झाला आहे. यापैकी एका व्यक्तीचा घटनास्थळीच मृत्यू झाला, तर गंभीर जखमी अवस्थेत रुग्णालयात दाखल केलेल्या अन्य दोघांचा उपचारादरम्यान मृत्यू झाला.
घटनेची माहिती मिळताच वरिष्ठ पोलिस अधिकारी आणि फॉरेन्सिक टीम तात्काळ घटनास्थळी दाखल झाली. घटनास्थळाची पाहणी करून पुरावे गोळा करण्यात आले असून संपूर्ण परिसर सील करण्यात आला आहे.
या हत्याकांडामागे गँगवॉर असण्याची शक्यता व्यक्त केली जात आहे. मात्र, हाणामारीमागील नेमके कारण अद्याप स्पष्ट झालेले नाही. पोलिसांनी तपास सुरू केला असून आरोपींचा शोध घेण्यासाठी पथके रवाना करण्यात आली आहेत.
नांदेडमधील या दुर्दैवी घटनेने कायदा-सुव्यवस्थेचा प्रश्न पुन्हा ऐरणीवर आला आहे. सध्या शहरात तणावपूर्ण वातावरण असून नागरिकांमध्ये भीतीचे वातावरण आहे. पोलिसांनी परिस्थिती नियंत्रणात असल्याचे सांगितले आहे.
