Students expressed candid views at 'Yuva Katta'
नांदेड, पुढारी वृत्तसेवा : स्वामी रामानंद तीर्थ मराठवाडा विद्यापीठात युवा कट्टा कार्यक्रमात विद्यार्थ्यांनी बुधवारी (दि.२२) नीट पेपर लीक प्रकरण, पर्यावरण परिणाम व जीवनदान, विद्यापीठ शिक्षणाचे अनुभव, राष्ट्रीय शैक्षणिक धोरण, शिक्षणातील बदल, युवकांमधील व्यसनाधीनता, बालविवाह व हुंडा पद्धती, कृषी धोरणावर परखड विचार मांडले. तसेच चारोळ्या आणि एकापेक्षा एक सरस कविता सादर करून युवा कट्ट्याची रंगत वाढविली.
भारत लोकसेवा प्रसारक, आकाशवाणी परभणी आणि स्वामी रामानंद तीर्थ मराठवाडा विद्यापीठाच्या विद्यार्थी विकास विभाग व परभणी आकाशवाणी यांच्या संयुक्त विद्यमाने आणि कुलगुरू डॉ. मनोहर चासकर व प्र- कुलगुरू डॉ. अशोक महाजन यांच्या मार्गदर्शनाखाली विद्यापीठात युवा कट्टा या विशेष कार्यक्रम घेण्यात आला. कुलसचिव डॉ. ज्ञानेश्वर पवार हे अध्यक्षस्थानी होते. तर परभणी आकाशवाणीचे कार्यक्रम अधिकारी सदानंद कामडी, प्रसिद्ध निवेदिका सुमेधा कुलकर्णी, सुषमा कुलकर्णी आणि डॉ. सुहास पाठक यांची प्रमुख उपस्थिती होती.
या कार्यक्रमात विद्यापीठातील पदवी, पदव्युत्तर व पीएच.डी. (संशोधक) विद्यार्थ्यांनी विविध समकालीन विषयांवर विचार मांडले. तसेच सुंदर चारोळ्या व कविता सादर करून उपस्थितांची वाहवा मिळवली. डॉ. राजपालसिंह चिखलीकर यांनी प्रास्ताविक केले. राष्ट्रीय सेवा योजनेचे संचालक डॉ. मारुति गायकवाड यांनी सूत्रसंचालन केले.
