Martyr Sachin Vananje cremated with military honors
देगलूर : पुढारी वृत्तसेवा
भारतीय सैन्यदलात कार्यरत असलेले जवान सचिन यादवराव वनंजे यांचा देशसेवेच्या कर्तव्यावर असतांना श्रीनगरच्या परिसरात दि.६ मे रोजी अपघाती मृत्यू झाला होता. त्यांच्यावर आज दि.९ मे रोजी देगलूर येथे अत्यंत शोकाकूल वातावरणात साश्रुनयनांनी शहीद सचिन वनंजे यांच्या पार्थिवावर शासकीय इतमामात अंत्यसंस्कार करण्यात आले. यावेळी खासदार, आमदार यांच्यासह हजारो चाहत्यांची उपस्थिती होती.
या घटनेची माहिती भारतीय सैन्यदलाअंतर्गत कुटुंबियांना मिळताच तालुक्यातील तमलूरसह देगलूरवर शोककळा पसरली होती. दरम्यान भारतीय सैन्यदलाचे उमेश बोहरा यांच्यासह शहीद सचिन वनंजेचा पार्थिव दि.९ मे रोजी देगलूर येथील सचिनच्या राहत्या घरी पहाटे ४.०० वाजण्याच्या दरम्यान दाखल होताच परिवारातील सदस्यांसह उपस्थितीतांच्या डोळ्यातून अश्रुधारा वाहू लागल्या.
यावेळी शहीद सचिनच्या घरी कुटुंबियांनी एकच टाहो फोडला. तर सकाळी ठिक ८.३० वाजता फुलांनी सजवलेल्या लष्कराच्या वाहनातून शहिद सचिन वनंजेच्या घरातुन अंत्ययात्रेला प्रारंभ झाला आणि शहरातील शिवाजी महाराज चौक, अण्णा भाऊ साठे चौक, डॉ बाबासाहेब आंबेडकर पुतळा, महात्मा गांधी चौक, अमरदिप हॉटेल असा प्रवास करत नगरपालिकेच्या शेजारी असलेल्या मैदानात अंत्यविधीसाठी त्यांचे पार्थिव आणण्यात आले. यावेळी शहिद सचिन वनंजे अमर रहे, अमर रहे च्या घोषणांनी परिसर दणाणून गेला.
यावेळी खासदार रविंद्र चव्हाण, आमदार जितेश अंतापुरकर, आमदार प्रताप पाटील चिखलीकर, माजी आमदार सुभाष साबणे, सुरेश गायकवाड, बालाजी खतगावकर, जिल्हाधिकारी राहुल कर्डीले, उप विभागीय अधिकारी अनुप पाटील, डी वाय एस पी संकेत गोसावी, तहसीलदार भरत सुर्यवंशी, गटविकास शेखर देशमुख, मुख्याधिकारी निलम कांबळे आदींसह आजी व माजी सैनिक आणि प्रचंड जनसमुदाय उपस्थित होता.
उपस्थितांनी श्रद्धांजली वाहिली व मुख्यमंत्र्यांचा शोकसंदेश वाचुन दाखवण्यात आला. शहीद सचिन वनंजेची शवयात्रा घरून निघताच प्रत्येकाचे डोळे पाणावले होते. शवयात्रेत हजारो नागरिक पायी चालत अंत्यविधी स्थळी पोहचले. देगलूर नगरपालिका शेजारी तयार केलेले अंत्यविधी स्थळी सीकंदराबाद व छत्रपती संभाजी नगरच्या भारतीय सैन्यदलाच्या पथकाने तोफांची सलामी देत मानवंदना दिली. त्यानंतर शहीद सचिन वनंजेच्या पार्थिवावर अग्निसंस्कार करण्यात आले. यावेळी हजारो उपस्थितांनी ‘शहीद सचिन अमर रहे’ अशा घोषणा देत आसमंत निनादून सोडला.
सचिन वनंजे सन २०१७ मध्ये भारतीय सैन्य दलात दाखल झाले होते. त्याची पहिली पोस्टिंग सियाचीन भागात झाली. त्यानंतर जालंधर पंजाब येथे त्यांनी सेवा केली. गेल्या दीड वर्षापासून ते श्रीनगर मध्ये कर्तव्यावर होते. दरम्यान दि.६ मे रोजी वाहन दरीत कोसळून त्यांचा मृत्यू झाला. तालुक्यातील हजारोंनी उपस्थिती दर्शवित आपल्या भारतमातेच्या पुत्राला साश्रुनयनांनी अखेरचा निरोप दिला.
