Center head took a bribe of Rs 3,000 from a teacher to approve leave
नांदेड, पुढारी वृत्तसेवा : तक्रारदाराची ४६ दिवसांची अर्जित रजा मंजूर करण्यासाठी लसिनगाव (ता. लोहा) जिल्हा परिषद शाळेतील केंद्र प्रमुखाला ३ हजार रुपयांची लाच घेताना लाच लुचपत प्रतिबंधक पथकाने रंगेहाथ पकडले. दिगांबर रामचंद्र शिंदे (५७) असे संशयिताचे नाव असून, ते लिसनगाव जि.प. शाळेत केंद्र प्रमुख आहेत. सध्या त्यांची नेमणूक लोहा गटशिक्षणाधिकारी कार्यालय येथे करण्यात आली आहे.
याविषयी अधिक माहिती अशी की, तक्रारदार हे २०१८ पासून भाद्रा (ता. लोहा) जिल्हा परिषद प्राथमिक शाळा येथे प्राथमिक शिक्षक या पदावर कार्यरत आहेत. त्यांनी त्यांच्या खासगी कारणास्तव दि. ९ फेब्रुवारी रोजी (४६) दिवसांची अर्जित रजा मंजूर होण्याकरिता लोहा गटशिक्षणाधिकारी कार्यालयात अर्ज दिला होता.
याठिकाणी लिसनगाव जि. प. शाळेचे केंद्रप्रमुख दिगंबर शिंदे हे पंचायत समिती लोहा कार्यालयाचे आस्थापना विभागामध्ये लिपिकाचे काम तसेच गटशिक्षणाधिकारी व्यवहारे यांचे सर्व कार्यालयीन कामे पाहतात. त्यामुळे तक्रारदारांनी त्यांची अर्जित रजा मंजूर झाली की नाही? हे पाहण्यासाठी लोहा पं. स. कार्यालय येथे जाऊन केंद्र प्रमुख शिंदे यांची भेट घेऊन विचारणा केली.
तेव्हा शिंदे यांनी तक्रारदार यांना अर्जित रजा मंजूर करण्यासाठी स्वतःसाठी व गटशिक्षणाधिकारी व्यवहारे यांच्यासाठी ४ हजार रुपये द्यावे लागतील, पैसे दिले तरच तुमची अर्जित रजा मंजूर होईल, असे म्हणून तक्रारदार यांना लाचेची मागणी केली आहे. तक्रारदाराने एसीबीकडे तक्रार केली.
पडताळणीतही ही बाब समोर आली. एसीबीच्या पथकाने १६ रोजी लोहा पंचायत समिती कार्यालयात सापळा रचून तडजोडी अंती केंद्रप्रमुख दिगंबर शिंदे यास तक्रारदाराकडून तीन हजार रुपयांची लाच स्वीकारताना रंगेहाथ पकडले. संशयित आरोपी शिंदे यास एसीबीच्या पथकाने ताब्यात घेतले असून, लोहा ठाण्यात गुन्हा दाखल करण्यात आला आहे.
