भोकरदन : तालुक्यातील सिपोरा बाजार येथील रावसाहेबनगर येथील श्री रामेश्वर सहकारी साखर कारखानाच्या वजन काट्यांची नुकतीच शासनाच्या भरारी पथकासह शेतकरी संघटनेच्या पदाधिकाऱ्यांनी संयुक्तपणे अचानक तपासणी केली. या तपासणीत कारखान्याचे वजन काटे अचूक आणि तंतोतंत असल्याचे प्रमाणपत्र प्रशासनाकडून देण्यात आले आहे.
सिपोरा बाजार येथील श्री रामेश्वर सहकारी साखर कारखाण्यात तहसील कार्यालयाच्या वैद्यमापन शास्त्र विभागाचे निरीक्षक व शेतकरी संघटनेच्या प्रतिनिधींनी कारखान्यास अचानक भेट देउन कारखान्याच्या वजन काट्याची शासनाच्या भरारी पथक व शेतकरी संघटनेकडून तपासणी करण्यात आली.
यावेळी वैद्यमापन शास्त्र निरीक्षक एस. एन. वाघ, तलाठी अंकुश प्रकाश बावस्कर, विशेष लेखा परीक्षक वर्ग 2 अशोक गहेनाजी जाधव,शेतकरी संघटनेचे तालुक्याध्यक्ष काकासाहेब गणपतराव साबळे यांच्यासह ऊस उत्पादक शेतकरी, तोडणी मुकादम आणि वाहन चालक यांच्या उपस्थितीत करण्यात आली. वजन काट्यावर करण्यात आलेल्या चाचणीत काटा 100 टक्के अचूक असल्याचे स्पष्ट झाले.
पारदर्शक कारभाराबाबत समाधान
श्री रामेश्वर सहकारी साखर कारखान्याच्या वजन काट्यावर करण्यात आलेल्या चाचणीत काटा 100 टक्के अचूक असल्याचे स्पष्ट झाले. यावेळी उपस्थित सर्व शेतकऱ्यांनी आणि वाहनमालकांनी कारखान्याच्या पारदर्शक कारभाराबद्दल समाधान व्यक्त केले.
