Outbreak of Kokada disease on capsicum
पिंपळगाव रेणुकाई, पुढारी वृत्तसेवा : भोकरदन तालुक्यातील पिंपळगाव रेणुकाईसह परिसरातील मिरची उत्पादक शेतकऱ्यांच्या सिमला मिरचीवर कोकडा रोगाचा प्रादुर्भाव झाल्याने शेतकरी अडचणीत सापडले आहेत.
भोकरदन तालुक्यातील पिंपळगाव रेणुकाईसह परिसरात सिमला मिरचीची मोठ्या प्रमाणावर लागवड केली जाते. यंदा पेरणीचा हंगाम लांबल्याने शेतकऱ्यांनी टँकरच्या पाण्यावर हजारो रुपये खर्च करून मिरचीची रोपे जगवली. मात्र पाऊस सुरू होताच मिरचीवर कोकडा रोगाचा मोठा प्रादुर्भाव झाला असून, शेतातील उभे सिमला मिरचीचे पीक कोकडा रोगामुळे अडचणीत सापडले आहे.
सुरुवातीला पानांवर कोकडा येऊन ते वाळू लागले. नंतर फळांवर काळे डाग पडून मिरची सड्डू लागली. फवारणी करूनही रोग आटोक्यात न आल्याने शेतकऱ्यांचा खर्च वाया गेला. एकरी ४० ते ५० हजार रुपये खर्च करूनही हातात काहीच न आल्याने शेतकरी पुन्हा आर्थिक संकटात सापडला आहे. तालुक्यातील काही भागांतही हीच स्थिती आहे. टँकर, मजुरी, खते, औषधांवर केलेला खर्च निघणेही मुश्कील झाले आहे.
त्यामुळे बँकेचे कर्ज व सावकारी कर्ज कसे फेडायचे, या चिंतेत शेतकरी आहेत. पावसाळा लांबल्याने सुरुवातीला मिरची वाचविण्यासाठी पाण्यात आणि आता कोकडा पडल्याने औषधात पैसे खर्च होत आहे. कृषी विभागाने तातडीने पंचनामे करून नुकसानग्रस्त शेतकऱ्यांना आर्थिक मदत द्यावी, अशी मागणी होत आहे.
