वडीगोद्री : मराठवाडा व पश्चिम महाराष्ट्रातील मराठा समाजाला जूनच्या आत कुणबी प्रमाणपत्र वाटप करा, अन्यथा आमरण उपोषण करण्याचा इशारा मराठा आंदोलक मनोज जरांगे यांनी दिला.
अंतरवाली सराटी येथे बुधवारी मनोज जरांगे पाटील हे माध्यमांशी बोलत होते. यावेळी पुढे बोलतांना ते म्हणाले की, काही अधिकारी कुणबी प्रमाणपत्र देण्यास टाळाटाळ करीत आहेत. हैदराबाद गॅझेटनुसार जात प्रमाणपत्र न देणाऱ्या अधिकाऱ्यांवर फौजदारी गुन्हे दाखल करा. माझी सहनशिलता संपू देऊ नका, असा इशारा मनोज जरांगे पाटील यांनी माध्यमांशी बोलताना दिला.
हैदराबाद गॅझेटनुसार जात प्रमाणपत्र देण्यास दिरंगाई होत असल्याने जरांगे पाटील यांनी नाराजी व्यक्त करत सरकारला जूनपर्यंतचा अल्टीमेटम दिला आहे. जूनपासून हैदराबाद व सातारा गॅझेटियर लागू होऊन मराठा समाज आरक्षणात न गेल्यास अंतरवालीत आमरण उपोषण सुरू करणार असल्याचे त्यांनी सांगितले.
