जालना : जालना-छत्रपती संभाजीनगर महामार्गावरील दावलवाडी गावाजवळ असलेल्या महिको कंपनीजवळ भरधाव एसटीने एसटीने उपविभागीय पोलिस अधिकारी अनंत कुलकर्णी यांच्या जीपला धडक दिल्याने झालेल्या अपघातात अनंत कुलकर्णी किरकोळ जखमी झाले. अपघातानंतर बस रस्त्याच्या खाली गेली.
अमरावती आगाराची छत्रपती संभाजीनगरकडे जाणारी बस (क्र.एमएच-२०-जीसी-३८१२ ) ही जालन्याहुन छत्रपती संभाजीनगरकडे जात असताना दावलवाडीजवळ एका प्रकरणात पंचनामा करण्यासाठी गेलेल्या उपविभागीय पोलिस अधिकारी अनंत कुलकर्णी यांच्या उभ्या जीपला बसने धडक दिली. त्यानंतर बसने रस्त्याच्या बाजूला उभ्या असलेल्या दुचाकीजवळ उभ्या असलेल्या महिलेला बसने धडक दिली. बसचे ब्रेक फेल झाल्याने हा अपघात घडल्याची प्राथमिक माहिती मिळाली. या घटनेत सुदैवाने अनंत कुलकर्णी यांना किरकोळ मार लागला.
उपविभागीय पोलिस अधिकारी यांच्या जीपमधील पोलिस उपनिक्षक पवन राजपुत यांच्यासह महिला शिक्षिका पंच अपघातात जखमी झाले आहेत. या प्रकरणी चंदनझिरा पोलिस ठाण्यात गुन्हा दाखल करण्याची प्रक्रिया सुरू होती.अपघातात बसमधील प्रवाशांना कोणतीही मोठी दुखापत झाली नाही. बसमधील प्रवाशांना इतर बसमधून पुढील प्रवासासाठी रवाना करण्यात आले. एसटी महामंडळाकडून अपघातग्रस्त बसची तपासणी केली जाणार आहे.
पोलिसांची धाव
अपघातानंतर घटनास्थळी चंदनझिरा पोलिस ठाण्याच्या पोलिस अधिकारी व कर्मचाऱ्यांसह एसटी महामंडळाच्या अधिकारी व कर्मचाऱ्यांनी धाव घेतली. जखमींना जिल्हा सामान्य रुग्णालयात उपचार करण्यात आले.
