जालना : शहरातील ढळवळेश्वर परिसरात झालेल्या लखन छगनलाल तुरे (वय ३८) यांच्या हत्या प्रकरणातील दोन फरार संशयित आरोपींना चंदनझिरा पोलिसांनी घाणेवाडी परिसरातून सोमवार, दि. ७ रोजी मध्यरात्री ताब्यात घेतले. शुभम काकासाहेब जोगदंड आणि किशोर देविदास जोगदंड अशी अटक करण्यात आलेल्या आरोपींची नावे आहेत. चारही आरोपींना मंगळवार, दि.८ रोजी न्यायालयात हजर केले असताना न्यायालयाने पाच दिवसांची पोलिस कोठडी सुनावली आहे.
दरम्यान, शुक्रवार, दि.४ रोजी ढवळेश्वर येथे लखन तुरे यांना बेदम मारहाण झाली होती. छत्रपती संभाजीनगर येथील खासगी रुग्णालयात उपचारादरम्यान त्यांच सोमवार, दि. ७ रोजी मृत्यू झाला होता. मारहाणीच्या घटनेनंतर आरोपी शुभम जोगदंड व किशोर जोगदंड हे जालना शहरातून पसार झाले होते. फरार आरोपींना पकडण्यासाठी चंदनझिरा पोलिस ठाण्याचे दोन तपास पथक तयार करण्यात आले. फरार आरोपींचा सलग तीन दिवस शोध घेतला.
दरम्यान, सोमवार, ७ रोजी मध्यरात्री पोलिस निरीक्षक किरण बिडवे यांना आरोपी राजूर रोडवरील घाणेवाडी शिवारातील एका मोसंबीच्या शेतात असल्याची माहिती मिळाली. पोलिसांनी तातडीने पथक रवाना करून आरोपींचा पाठलाग केला. पोलिसांची चाहूल लागताच आरोपी पळून जाण्याचा प्रयत्न करू लागले. मात्र, पोलिसांनी त्यांना घेराव घालत शुभम जोगदंड व किशोर जोगदंड या दोघांना बेड्या ठोकल्या.
चौकशीदरम्यान आरोपींनी पैशाच्या देवाणघेवाणीवरून लखन तुरे यांचा खून केल्याची कबुली दिल्याचे पोलिसांनी सांगितले. या प्रकरणातील आर्थिक व्यवहार हा व्याजाच्या पैशाचा असल्याचे तपासात निष्पन्न झाले आहे. या प्रकरणाचा पुढील तपास पोलीस उपनिरीक्षक दिगंबर पवार करीत आहेत.
या गुन्ह्यात यापूर्वी चंदनझिरा पोलिसांनी नवनाथ देविदास जोगदंड व राहुल प्रल्हाद कंठाळे यांना अटक केली होती. त्यांना न्यायालयासमोर हजर केल्यानंतर पोलिस कोठडी सुनावण्यात आली होती. आता आणखी दोन आरोपी अटक झाल्याने या हत्या प्रकरणातील तपासाला वेग आला आहे.
या पथकाने केली ही कारवाई
पोलिस अधीक्षक तेगबीर सिंह संधू, अपर पोलिस अधीक्षक डॉ. विक्रम साळी व उपविभागीय पोलिस अधिकारी अनंत कुलकर्णी यांच्या मार्गदर्शनाखाली पोलिस निरीक्षक किरण बिडवे, पोउपनि दिगंबर पवार, रवी देशमाने, मारीओ स्कॉट, सपोउपनि राजेंद्र ठाकूर, प्रशांत देशमुख, कृष्णा तोंग, अभिजीत वायकोस, राजू पवार, शिवाजी जमधडे, अशोक जाधव, सागर खैरे, गजानन काकडे, महिला पोलिस कर्मचारी रेश्मा गुरुम, चालक ठाकूर, जावभाये, स्थानिक गुन्हे शाखेचे पाहेकर सागर व बाळीकर दत्ता वाघुंडे यांनी केली.
