Jalna News : Rescue of seven bovine animals tied for slaughter purpose
जालना, पुढारी वृत्तसेवा : कत्तलीच्या उद्देशाने निर्दयतेने बांधून ठेवलेल्या सात गोवंशीय जनावरांची कदीम जालना पोलिसांनी सुटका केली. ही कारवाई शुक्रवारी (दि. १९) सायंकाळी साडेसातच्या सुमारास युसूफ कॉलनी, जुना जालना परिसरात करण्यात आली. या प्रकरणी पोलिसांनी एका व्यक्तीविरुद्ध गुन्हा दाखल केला आहे.
कदीम जालना पोलिस ठाण्याच्या पथकाला युसूफ कॉलनी परिसरात गोवंशीय जनावरे कत्तलीच्या उद्देशाने बांधून ठेवल्याची गोपनीय माहिती मिळाली होती. माहितीच्या आधारे पोलिसांनी घटनास्थळी छापा टाकला. यावेळी शकील अब्दुल बासेद कुरेशी यांच्या मालकीच्या फ्याच्या शेडमध्ये सात गोवंशीय जनावरे आढळून आली.
या जनावरांना चारा व पाण्याची कोणतीही व्यवस्था न करता निर्दयतेने दोरीने बांधून गोठ्यामध्ये कोंबून ठेवण्यात आले होते. जनावरे कत्तलीच्या उद्देशाने बेकायदेशीररीत्या ठेवल्याचे निदर्शनास आल्यानंतर पोलिसांनी तत्काळ कारवाई केली. ताब्यात घेण्यात आलेल्या सात गोवंशीय जनावरांची किंमत सुमारे ८० हजार रुपये असल्याचे पोलिसांनी नमूद केले आहे.
याप्रकरणी आरोपी शकील अब्दुल बासेद कुरेशी याच्याविरुद्ध महाराष्ट्र गोवंश हत्या प्रतिबंधक कायदा तसेच पशुसंरक्षण अधिनियमातील संबंधित कलमांनुसार गुन्हा दाखल करण्यात आला. ताब्यात घेण्यात आलेल्या जनावरांची नियमानुसार सुटका करून त्यांना सुरक्षित ठिकाणी हलविण्यात आले.
यांनी केली कारवाई
पोलिस अधीक्षक तेगबीरसिंग संधू, अपर पोलिस अधीक्षक साळी, उपविभागीय पोलिस अधिकारी कुलकर्णी यांच्या मार्गदर्शनाखाली कदीम जालना पोलिस ठाण्याच्या पथकाने ही कारवाई केली.
