Chemists in Ghansawangi Submit Memorandum to Tehsildar
घनसावंगी, पुढारी वृत्तसेवा :
घनसावंगी तालुक्यात औषधी विक्रेत्यांच्या बंदला उत्स्फूर्त प्रतिसाद मिळाला. ऑनलाईन औषध विक्री, ई-पोर्टलद्वारे होणारी औषधांची विक्री तसेच संबंधित शासन निर्णयांच्या विर-ोधात हे आंदोलन करण्यात आले.
यावेळी औषध विक्रेत्यांच्या विविध समस्या, ऑनलाईन औषध विक्रीमुळे पारंपरिक औषध व्यवसायावर होत असलेला परिणाम तसेच ग्राहकांच्या सुरक्षिततेसंदर्भातील मुद्दे याबाबत सविस्तर चर्चा करण्यात आली.
औषध विक्रेत्यांनी सांगितले की, ऑनलाईन औषध विक्रीमुळे अनेक नियमांचे उल्लंघन होत असून ग्राहकांच्या आरोग्याशी थेट संबंधित बाबींमध्ये धोका निर्माण होण्याची शक्यता आहे. डॉक्टरांच्या सल्ल्याशिवाय औषधे उपलब्ध होणे बनावट औषधांची शक्यता तसेच ग्रामीण भागातील लहान औषध विक्रेत्यांवर आर्थिक संकट ओढवण्याची भीती यामुळे संघटनांनी आंदोलनाची भूमिका घेतली आहे.
तहसीलदार रमेश पागोटे यांनी निवेदन स्वीकारून संबंधित मागण्या वरिष्ठ स्तरापर्यंत पोहोचविण्याचे आश्वासन दिले. यावेळी शासन स्तरावर योग्य तो निर्णय होईल, अशी अपेक्षा व्यक्त करण्यात आली.
