The mayor and deputy mayor will be elected tomorrow
छत्रपती संभाजीनगर, पुढारी वृत्तसेवा : महापालिकेवर तब्बल पाच वर्षांच्या प्रशासकीय राजवटीनंतर अखेर लोकप्रतिनिधींचा कारभार सुरू होणार असून, मंगळवारी (दि.१०) शहराच्या नव्या महापौर व उपमहापौरांची निवड केली जाणार आहे. संख्याबळाच्या जोरावर सत्ताध-ारी भाजप-शिंदेसेना युतीचा विजय निश्चित मानला जात असून, महापौरपदी भाजपचे समीर राजूरकर तर उपमहापौरपदी शिंदेसेनेचे राजेंद्र जंजाळ यांची निवड जवळपास ठरलेली आहे.
महानगरपालिकेच्या २९ प्रभागांतून एकूण ११५ नगरसेवक निवडून आले आहेत. यामध्ये भाजपने ५७ जागा जिंकत सर्वात मोठा पक्ष म्हणून आपले वर्चस्व सिद्ध केले आहे. शिंदेसेनेकडे १३ नगरसेवक असून, दोन्ही पक्ष मिळून सत्ताधारी युतीकडे एकूण ७० नगरसेवकांचे बळ आहे. त्यामुळे महापौर व उपमहापौर निवडणूक केवळ औपचारिकता ठरणार असल्याचे चित्र आहे.
विरोधी पक्ष एमआयएमकडे ३३ नगरसेवक असून, निवडणूक बिनविरोध होऊ नये यासाठी त्यांनी महापौर व उपमहापौर दोन्ही पदांसाठी उमेदवार दिले आहेत. मात्र संख्याबळाच्या तुलनेत त्यांचा प्रभाव मर्यादित राहणार आहे. ठाकरे गटाकडे ६ तर वंचित बहुजन आघाडीकडे ४ नगरसेवक आहेत.
सकाळी ११ वाजता निवडणूक प्रक्रिया
महापौर व उपमहापौर निवडीची प्रक्रिया मंगळवारी सकाळी ११ वाजता महापालिकेच्या प्रबोधनकार ठाकरे सभागृहात पार पडणार आहे. जिल्हाधिकारी दिलीप स्वामी हे पीठासीन अधिकारी म्हणून काम पाहणार आहेत. निवडणूक प्रक्रियेदरम्यान नगरसेवकांना उमेदवाराच्या समर्थनार्थ उभे राहून मतदान करता येणार असून, अनुपस्थित व मतदान न करणाऱ्या नगरसेवकांची नोंद कार्यवृत्तात केली जाणार आहे.
समीर राजूरकर ठरणार शहराचे २३ वे महापौर
भाजपचे समीर राजूरकर यांची मंगळवारी महापौरपदी निवड होणार असून, ते शहराचे २३ वे महापौर म्हणून महापालिकेच्या इतिहासात नोंदवले जाणार आहेत.
