१६ सदस्यीय स्थायी समितीत भाजपचे ८ नगरसेवक

The 16-member Standing Committee includes 8 BJP corporators

छत्रपती संभाजीनगर, पुढारी वृत्तसेवा :

महापालिका निवडणुकीनंतर आता सत्तास्थापन प्रक्रियेला गती मिळाली असून, सर्वाधिक अधिकारशाली मानल्या जाणाऱ्या स्थायी समितीचे चित्र जवळपास स्पष्ट झाले आहे. ११५ नगर-सेवकांमधून दोन वर्षांच्या कालावधीसाठी १६ सदस्यीय स्थायी समितीची रचना केली जाणार असून, संख्याबळाच्या आधारे भाजपचे आठ, एमआयएमचे पाच, शिंदे गटाचे दोन तर ठाकरे गटाचे एक नगरसेवक स्थायी समितीवर जाणार असल्याचे सूत्रांकडून सांगण्यात आले.

महापालिकेच्या निवडणूक निकालानंतर आता महापौर, उपमहापौर, विरोधी पक्षनेता, स्थायी समिती सभापती व सदस्य, सभागृह नेता तसेच विविध विषय समित्यांच्या सभापती व सदस्यांची निवड केली जाणार आहे. या प्रक्रियेची सुरुवात सोमवारी (दि.१९) नगरसचिवांकडे प्रमाणपत्र सादर करून नगरसेवक म्हणून राजपत्रात नावे प्रसिद्ध करण्यापासून होणार आहे.

त्यानंतर महापौर व उपमहापौर निवडीची औपचारिक प्रक्रिया राबवली जाणार आहे. महापालिकेत भाजप हा सर्वात मोठा पक्ष ठरला असून, पक्षाकडे ५७ नगरसेवकांचे बळ आहे. त्याखालोखाल एमआयएमकडे ३३ नगरसेवक आहेत. तर शिंदे गटाला १३ जागा मिळाल्या असून ठाकरे गटाचे सहा नगरसेवक निवडून आले आहेत.

काँग्रेस व राष्ट्रवादी काँग्रेसला प्रत्येकी एका जा-गेवर समाधान मानावे लागले आहे. विशेषतः स्थायी समिती सभापतींकडे मोठे आर्थिक अधिकार असल्याने या समितीवर जाण्यासाठी नगरसेवकांमध्ये मोठी उत्सुकता असते. मात्र सध्याच्या संख्याबळानुसार स्थायी समितीवर भाजपचे वर्चस्व स्पष्टपणे दिसणार असून, येत्या काळातील महापालिकेच्या कारभाराची दिशा याच समितीतून ठरणार असल्याचे चित्र आहे.

महानगर पालिकेचा आर्थिक कणा

दरम्यान स्थायी समिती ही महापालिकेच्या आर्थिक कारभाराचा कणा मानली जाते. मनपाच्या खर्चावर नियंत्रण ठेवणे, आर्थिक प्रस्तावांना मंजुरी देणे, विविध विकासकामांना प्रशासकीय व आर्थिक मान्यता देणे, ही महत्त्वाची जबाबदारी स्थायी समितीवर असते.