गंगापूर/पैठण : वैजापूर शहरातील विविध भागांत वीज मीटरमध्ये फेरफार करून वीजचोरी करणाऱ्या सात जणांविरोधात गंगापूर पोलिसांत गुन्हा दाखल करण्यात आला आहे. महावितरणच्या मोहिमेत एकूण ६ लाख ४३ हजार रुपयांहून अधिक रकमेची वीजचोरी उघडकीस आली आहे.
महावितरणने वैजापूर शहरात राबविलेल्या तपास मोहिमेदरम्यान खासगी व व्यावसायिक वापरासाठी देण्यात आलेल्या विद्युत मीटरमध्ये ३१ ऑक्टोबर २०२५ ते ५ मार्च २०२६ या कालावधीत फेरफार करून वीजचोरी करण्यात आल्याचे निदर्शनास आले. या प्रकरणात तब्बल ५ लाख २७ हजार ११५ रुपयांची, म्हणजेच २१ हजार ५७७ युनिट वीजचोरी झाल्याचे उघड झाले.
याप्रकरणी महावितरणचे सहायक अभियंता योगेश लक्ष्मण खोमणे यांच्या फिर्यादीवरून फिरोज शेख मुस्तफा, झहीर अब्दुल मजीद शेख, विशाल रवींद्र गुळस्कर, महेश सुरेश टेके, अमीर खान तबरेज खान, नामदेव फुलचंद महाले व मनोज शिवलिंग राजपूत (सर्व रा. वैजापूर) यांच्याविरोधात गंगापूर पोलिसांत गुरुवारी (दि. २१) दुपारी २ वाजता वीज चोरीचा गुन्हा दाखल करण्यात आला. महावितरणकडून दंड भरण्यासाठी मुदत देण्यात आली होती; मात्र संबंधितांनी दंड न भरल्याने ही कारवाई करण्यात आली.
महावितरणचे सहायक अभियंता योगेश खोमणे यांच्या फिर्यादीवरून रोहित पवार (रा. मोकळा प्लॉट, एमआयडीसी चितेगाव, ता. पैठण) याच्याविरोधात गंगापूर पोलिसांत गुरुवारी दुपारी १.३० वाजता गुन्हा दाखल करण्यात आला. या प्रकरणाचा पुढील तपास सफौ. अवधूत करीत आहेत.
चितेगावतही वीज चोरी
पैठण तालुक्यातील चितेगाव एमआयडीसी परिसरातही महावितरणने धडक तपासणी मोहीम राबवली. येथे रोहित कृष्ण पवार याच्या व्यावसायिक वीजजोडणीची १६ मार्च रोजी पाहणी केली असता रोहित्राच्या वीज वितरण पेटीत आकडा टाकून वीजचोरी सुरू असल्याचे आढळून आले. या प्रकरणात १ लाख १५ हजार ९७९ रुपये, म्हणजेच ३ हजार ४१३ युनिट वीजचोरी झाल्याचे निष्पन्न झाले.
