Police Thwart Attempt at Illegal Cattle Slaughter
वाळूज, पुढारी वृत्तसेवा : वाळूज पोलिसांनी रविवार (दि. २४) रोजी वाळूजलगतच्या नारायणपूरात धाडसी कारवाई करीत अवैध गोवंश कत्तलीचा प्रयत्न उधळून लावला. गावाच्या पूर्व बाजूस असलेल्या एका जुन्या वाड्यात छापा टाकून पोलिसांनी ९ गायींची सुटका केली. या प्रकरणी एका संशयितास ताब्यात घेण्यात आले तर दुसरा आरोपी फरार झाला आहे. विशेष म्हणजे नारायणपुरात यापूर्वीही अशा प्रकारची कारवाई करण्यात आली होती.
या विषयी पोलिसांनी सांगितले की, वाळूज भागात गस्त घालणारे पोउपनि. रमेश राठोड यांच्या पथकाला नारायणपुरात गाईची अवैध कत्तल सुरू असल्याची माहीती मिळाली होती. रविवारी सकाळी वाळूज पोलिस ठाणे हद्दीतील नारायणपूरच्या पूर्व बाजूच्या एका जुन्या वाड्यावर छापा टाकला.
यावेळी तेथे गोवंश कत्तलीची तयारी सुरू असल्याचे निदर्शनास आले. घटनास्थळी ९ गायी आढळून आल्या. तसेच धारदार शस्त्रे, मीठ, पाण्याचे ड्रम, दोरखंड व इतर साहित्यही पोलिसांनी जप्त केलेया प्रकरणी वाळूज पोलिसांनी मोसीन बशीर शेख, बशीर अजीज शेख दोघेही रा. पंढरपुर यांच्यावर गुन्हा दाखल करण्यात आला आहे.
