Pay ₹20 lakh if you want custody of the son; jewelry looted after assault
छत्रपती संभाजीनगर : मुलाचा ताबा आणि दाखल केलेला गुन्हा मागे घेण्यासाठी २० लाख रुपयांची मागणी करत सासरच्या मंडळींनी थेट पोलिस कॉलनीत घुसून जावयावर चाकू आणि लोखंडी रॉडने प्राणघातक हल्ला केला.
तसेच, मारहाण करून कपाटातील १६ ग्रॅमचे सोन्याचे दागिनेही लुटून नेले. ही धक्कादायक घटना गुरुवारी (दि. ४) दुपारी मिलकॉर्नर येथील पोलिस वसाहतीत घडली. याप्रकरणी बेगमपुरा पोलिस ठाण्यात पाच जणांविरुद्ध गुन्हा दाखल करण्यात आला आहे.
पोलिस कर्मचारी समीर शेख (३४) यांच्या पत्नीचे निधन झाले असून त्यांचा साडेतीन वर्षांचा मुलगा नाशिकला सासूकडे होता. समीर यांनी त्याला सोबत आणल्याने सासरच्यांनी २० लाखांची मागणी सुरू केली.
गुरुवारी दुपारी साला राज शेख, सासू नाजमीन, आजे सासरे इक्बाल शेख यांच्यासह पाच जणांनी समीर यांच्या घरात घुसून चाकू आणि रॉडने हल्ला केला. मध्यस्थी करणाऱ्या समीर यांच्या आईलाही मारहाण करून आरोपींनी दागिने लुटून पोबारा केला.
