Next hearing in the corporator disqualification case soon
छत्रपती संभाजीनगर, पुढारी वृत्तसेवा : नगरसेवक अपात्रता प्रकरणातील सुनावणीदरम्यान तक्रारदारांकडून नवे मुद्दे व पुरावे मांडले जात असल्याने संबंधित नगरसेवकांना म्हणणे मांडण्यासाठी महापालिका आयुक्त अमोल येडगे यांनी वेळ वाढवून दिला आहे. पुढील सुनावणीच्या तारखा निश्चित करण्यात आल्या असून, येत्या दोन-तीन दिवसांत त्या संबंधित नगरसेवक व तक्रारदारांना कळविण्यात येतील, अशी माहिती आयुक्तांनी मंगळवारी (दि. ८) दिली.
महापालिका निवडणुकीत विजयी झालेल्या ११५ पैकी २५ नगरसेवकांविरोधात दोनपेक्षा अधिक अपत्ये, अतिक्रमण, अनधिकृत बांधकाम तसेच अतिक्रमणाला प्रोत्साहन दिल्याप्रकरणी ३८ तक्रारी दाखल आहेत. यामध्ये एमआयएमचे १८, भाजपचे सहा आणि शिवसेना शिंदे गटाच्या एका नगरसेवकाचा समावेश आहे.
आयुक्त येडगे यांनी १७ व २४ ऑगस्ट तसेच ७ सप्टेंबर रोजी सुनावणी घेत ३८ पैकी २७ तक्रारींवर सुनावणी पूर्ण केली आहे. उर्वरित ११ तक्रारींवर १५ सप्टेंबर रोजी सुनावणी प्रस्तावित आहे. मात्र, नव्याने मांडण्यात आलेले मुद्दे व पुराव्यांचा अभ्यास करून उत्तर देण्यासाठी नगरसेवकांनी वेळ मागितला. त्यामुळे नैसर्गिक न्यायाच्या तत्त्वानुसार त्यांना म्हणणे मांडण्याची संधी देण्यात आली आहे.
