Lumpy skin disease outbreak creates fear among livestock owners in Kannada taluka
कन्नड, पुढारी वृत्तसेवा : जनावरांच्या लम्पी स्कीन या आजाराने आता तालुक्यात शिरकाव केला असून गेल्या आठ दिवसांत दोन गायींना व दोन वासरांना अशा चार गोवंशीय जनावरांना यांची लागण झाली आहे. अशी माहिती पशुसंवर्धन कार्यालयाकडून प्राप्त झाली आहे. त्यामुळे तालुक्यातील पशुधनमालकांमध्ये भीतीचे वातावरण निर्माण झाले आहे.
तालुक्यात गोवंशीय पशुधनाची संख्या बघता या आजाराची लागण झालेल्या जनावरांची संख्या अतिशय कमी आहे, असे पशुसंवर्धन कार्यालयाकडून सांगितले जात आहे. लम्पी स्कीन हा आजार संसर्गजन्य आहे. त्या आजाराचा प्रादुर्भाव रोखण्यासाठी तालुका पशुसंवर्धन कार्यालयाकडून नुसता तोंडी सल्ला शेतकऱ्यांना दिला जातो आहे.
या लम्पी आजाराचा प्रादुर्भाव तालुक्यातील इतर ठिकाणी होण्या अगोदरच याला रोखण्यासाठी तालुका पशुसंवर्धन विभागाने आताच ठोस पाऊले उचलून तातडीने उपाययोजना करणे गरजेचे असल्याचे पशुमालकांचे म्हणणे आहे. सोमवारी (ता. ११) कन्नड शहरातील एका शेतकऱ्याने लम्पी आजाराने बाधित असलेल्या एका गायीला उपचारासाठी शहरातील पशुवैद्यकीय दवाखान्यात आणले होते.
परंतु त्या गायीचे रक्त तपासणी व इतर कोणतेही उपचार न झाल्याने त्या शेतकऱ्याने नाराजी व्यक्त केली. तालुक्यात इतर ठिकाणीदेखील लम्पी बाधित जनावरे आहेत. पशुधन मालक स्वतःच्या खचर्चाने जनावरांवर औषधोपचार करत आहेत. त्यामुळे पशुधन मालकाला आर्थिक फटका बसतो आहे. लम्पीचा प्रादुर्भाव रोखण्यासाठी वेळेत उपचार, नियमित रक्त नमुने तपासणी, मृत जनावरांचे पंचनामे आणि लोकजागृती आवश्यक आहे.
