खुलताबाद : शहरातील (बायपास) बाह्यमार्गावरील न्यायालयासमोर छत्रपती संभाजीनगर-वेरूळ महामार्गावर दोन दुचाकींची समोरासमोर भीषण धडक झाली. या अपघातात एक ठार, एक गंभीर जखमी तर दोघे किरकोळ जखमी झाल्याची घटना सोमवारी (दि.13) रात्री घडली. अजित अन्ना बनकर (20, रा. सुलिभंजन, ता. खुलताबाद) असे मृत तरुणाचे नाव आहे.
पोलिसांकडून मिळालेल्या माहितीनुसार, सोमवारी रात्री दहा ते साडेदहाच्या सुमारास एक दुचाकी सुलिभंजन येथून खुलताबादच्या बाह्यमार्गाने वेरूळकडे जात होती, तर दुसरी दुचाकी वेरूळहून छत्रपती संभाजीनगरकडे येत होती. दरम्यान, दोन्ही चालकांना एकमेकांचा अंदाज न आल्याने समोरासमोर जोरदार धडक झाली.
या भीषण अपघातात अजित बनकर यांचा उपचारादरम्यान मृत्यू झाला. अप्पाराव घुसळे, शुभम घुसळे (रा. सुलिभंजन) तर खुलताबाद शहरातील सय्यद सावेज हे तिघे जखमी झाले. या तिघांना छत्रपती संभाजीनगर येथील घाटी रुग्णालयात दाखल करण्यात आले आहे.
घटनेनंतर परिसरात काही काळ तणावाचे वातावरण निर्माण झाले होते. या प्रकरणी पोलिसांनी नोंद घेतली असून, पुढील तपास सुरू आहे.
