Illegal transportation: Case registered against Rapido founders
छत्रपती संभाजीनगर, पुढारी वृत्तसेवा : कोणतीही शासकीय परवानगी नसताना आणि थेट सर्वोच्च व उच्च न्यायालयाच्या आदेश झुगारून शहरात बेकायदा बाईक टॅक्सी चालवणाऱ्या 'रॅपीडो' अॅपला आरटीओने दणका दिला आहे. प्रवाशांच्या सुरक्षेशी खेळून शासनाची आर्थिक फसवणूक केल्याप्रकरणी 'रॅपीडो' कंपनीचे संस्थापक आणि संचालकांवर वेदांतनगर पोलिस ठाण्यात फसवणूक आणि मोटार वाहन कायद्यान्वये बुधवारी (दि.२९) गुन्हा दाखल करण्यात आला आहे.
'रोपेन ट्रान्सपोर्ट प्रायव्हेट लिमिटेड' (रॅपीडो) चे संस्थापक ऋषीकेश एस. आर., पवन गुटुपल्ली आणि अरविंद संका (सर्व रा. हैदराबाद) अशी गुन्हा दाखल झालेल्या संचालकांची नावे आहेत.
या प्रकरणी प्रादेशिक परिवहन कार्यालयाचे मोटार वाहन निरीक्षक अभिजीत अण्णासाहेब तेली जगनाडे (३५) यांनी बुधवारी फिर्याद दिली आहे. त्यानुसार, मोटार व्हेईकल अॅग्रिगेटर गाईडलाईन्स २०२६' आणि बाईक टॅक्सी पॉलिसी २०२५ नुसार प्रवासी वाहतुकीसाठी शासनाची परवानगी घेणे बंधनकारक आहे. मात्र रॅपीडो कंपनीने आरटीओ कार्यालयाकडे कोणताही अर्ज सादर न करता, तसेच कोणतीही परवानगी न घेता शहरात अॅपद्वारे बेकायदा प्रवासी वाहतूक सुरू आहे. रॅपीडो कंपनीचा परवान्यासाठीचा अर्ज परिवहन आयुक्तांनी यापूर्वीच फेटाळून लावला आहे.
याविरोधात कंपनीने मुंबई उच्च न्यायालयात धाव घेतली होती, ठेवली राज्याच्या मात्र न्यायालयाने १३ जानेवारी २०२३ रोजी सदर अॅप बंद करण्याचे स्पष्ट निर्देश दिले होते. यानंतर कंपनीने सर्वोच्च न्यायालयात दाखल केलेली याचिकाही फेटाळण्यात आली आहे. असे असतानाही कंपनीने बेकायदेशीरपणे अॅपद्वारे वाहतूक सुरूच ठेवल्याने हा न्यायालयाचाही अवमान ठरतो. अखेर आरटीओ अधिकाऱ्यांनी रॅपिडो कंपनीचे मालक आणि संचालकांवर बीएनएस कलम ३१८ (३), ३(५), मोटार वाहन अधिनियम आणि माहिती तंत्रज्ञान कायद्याच्या विविध कलमांन्वये वेदांतनगर पोलिस ठाण्यात गुन्हा दाखल केला.
'डमी राईड' करून फोडले बिंग
आरटीओच्या वायुवेग पथक क्रमांक-२ मधील मोटार वाहन निरीक्षक अभिजीत तेली जगनाडे, अरुणा लहामगे आणि गंगाराम भागडे यांनी जून-जुलै महिन्यात स्वतः अॅपवरून 'डमी राईड' बुक केल्या. यात मनोज जोशी, अमीर खान आणि शौनक गोरे या चालकांना रंगेहाथ पकडून त्यांच्यावर दंडात्मक कारवाई करण्यात आली. त्यानंतर थेट कंपनीच्या संचालकांवर गुन्हा नोंद केला आहे.
ना चारित्र्य पडताळणी, ना सुरक्षेची हमी
धक्कादायक बाब म्हणजे, यात दुचाकी चालवणाऱ्या चालकाची कोणतीही चारित्र्य पडताळणी किंवा वैद्यकीय कागदपत्रांची तपासणी कंपनीकडून केली जात नाही, जे प्रवाशांच्या सुरक्षेसाठी अत्यंत धोकादायक आहे.
