Firecrackers worth a staggering 10 crore for Diwali celebrations
छत्रपती संभाजीनगर, पुढारी वृत्तसेवा : दीपोत्सव म्हणजेच दिव्यांचा सण म्हणून ओळखल्या जाणाऱ्या दिवाळीत जोरदार आतषबाजीची परंपराही कायम असल्याने फटाका बाजार सज्ज झाला आहे. यंदा दिवाळीनिमित्त शहरात अयोध्यानगरीसह पाच ठिकाणी मार्केट सजले असून, सुमारे १० कोटी रुपयांचे फटाके विक्रीसाठी दाखल झाले आहेत. लहान मुलांपासून मोठ्यांपर्यंत सर्वांनाच आकर्षित करणारे विविध प्रकारचे फटाके बाजारात उपलब्ध झाले असून, ग्राहकांच्या स्वागतासाठी विक्रेत्यांनी जय्यत तयारी केली आहे.
दिवाळीच्या पार्श्वभूमीवर शहरातील फटाका विक्री केंद्रांवर विविध कंपन्यांचे आणि वेगवेगळ्या किमर्तीचे फटाके दाखल झाले आहेत. यंदा २० ते २५ टक्क्यांनी फटाके महाग झाले असले तरी हौशींकडून फटाक्यांची खरेदी होणारच आहे. फुलबाज्या, अनार, चक्री, भुईचक्र, रॉकेट, लवंगी फटाके, लक्ष्मी बॉम्ब यांसह रंगीबेरंगी आतषबाजी करणाऱ्या फटाक्यांचे आकर्षण कायम आहे.
कमी आवाजाचे आणि आकर्षक रोषणाई करणारे फटाकेही बाजारात उपलब्ध आहेत. याशिवाय विविध प्रकारच्या फटाक्यांचे कॉम्बो पॅक ग्राहकांचे लक्ष वेधून घेत आहेत. शहरात एकूण १२ फटका मार्केट आहेत. यंदा या मार्केटमध्ये २१८ फटाक्यांचे स्टॉल्स उभारण्यात आले आहेत. या दुकानांमध्ये अंदाजे १० कोटींहून अधिकचा माल विक्रीसाठी दाखल झाला आहे. स्टॅण्डर्ड कंपन्यांच्या मालाच्या दरांमध्ये यंदा ३० ते ४० टक्के वाढ झाली आहे.