Farmers brought maize to the market committee office
वैजापूर, पुढारी वृत्तसेवा :
शेतकऱ्यांच्या हिताला प्राधान्य देण्याच्या ऐवजी बाजार समितीचे प्रशासन लिलाव प्रक्रियेत व्यापाऱ्यांना पाठीशी घालून शेतकऱ्यांमध्ये दुजाभाव करत आहे. त्यामुळे एकाच दर्जाच्या मकाला कमी जास्त भाव मिळून शेतकऱ्यांवर अन्याय होत आहे, असा आरोप करत भायगाव (तालुका वैजापूर) येथील शेतकऱ्यांनी लिलावासाठी पाच ट्रॅक्टरमधून आणलेली जवळपास दोनशे क्विटल मका थेट बाजार समिती कार्यालयाच्या आवारात आणली. या मकाला लिलावात व्यापाऱ्यांकडून प्रतिक्विटल एक हजार ६१८ रुपये भाव देण्यात आला.
याच प्रतीच्या मका असलेल्या २६ वाहनाला प्रतिक्विटल १७०० ते १७३६ रुपये भाव देण्यात आला. मग हा दुजाभाव का, असा संतप्त सवाल मका उत्पादकांनी प्रशासनाला केला. आम्हाला १७०० रुपये भाव द्या, अशी मागणी करत लक्ष्मण ठोंबरे यांच्यासह मनोज नळे, विजय अंभोरे, उमेश उशीर, भावराव ठोंबरे, अरुण जाधवर, भावलाल जाधव या शेतकऱ्यांनी बाजार समितीचे सचिव प्रल्हाद मोटे व सहाय्यक सचिव एस. के. निकम यांना घेराव घातला वं त्यांना धारेवर धरले.
यावर मोटे व निकम यांनी या शेतकऱ्यांना पाच वाजता होत असलेल्या लिलाव प्रक्रियेत पुन्हा सहभाग नोंदवण्याची सूचना केली. मात्र ही सूचना मान्य न झाल्याने मकाचे पाचही ट्रॅक्टर समिती कार्यालयाच्या आवारात उभे करण्यात आले. प्रशासनाने हा प्रश्न सोडविण्याची मागणी केली.
दराची दिली माहिती
शनिवारी झालेल्या लिलावात ४६ वाहनांना १४०० ते १७०० रुपये प्रतिक्विंटल भाव मिळाला तर २६ वाहनांना १७०० ते १७३६ रुपये भाव मिळाला, अशी माहिती बाजार समिती प्रशासनातर्फे देण्यात आली. दरम्यान, शासनाने एफएक्यू दर्जाच्या मकासाठी प्रतिक्विटल दोन हजार ४६० रुपये भाव जाहीर केला आहे. जोपर्यंत संचालक मंडळ यावर निर्णय घेत नाही, तोपर्यंत येथून ट्रॅक्टर हलवणार नाही, अशी भूमिका मका उत्पादकांनी घेतली.
