Disruption in the alliance; BJP rebel also determined to contest
छत्रपती संभाजीनगर, पुढारी वृत्तसेवा : पदवीधर निवडणूकीत उमेदवारी मागे घेण्याच्या पहिल्या दिवशी महाविकास आघाडीतील शिवसेना (उबाठा) आणि राष्ट्रवादी कॉग्रेस (श.प.) या दोन्ही पक्षांनी उमेदवारी कायम ठेवण्याचा दावा करीत मैत्रीपूर्ण लढतीचे संकेत दिले आहेत. तर दुसरीकडे महायुतीचे अधिकृत उमेदवार सतीश चव्हाण यांच्याविरोधात बंडखोरी करून अर्ज दाखल केलेले भाजपचे एम. के. देशमुख यांनीही रिंगणात कायम राहण्याचा निर्धार केला आहे. त्यामुळे आज अर्ज मागे घेण्याच्या शेवटच्या दिवशी मनधरणीला कितपत यश येणार की हेच चित्र कायम राहणार, हे पाहावे लागणार आहे.
मराठवाडा पदवीधर मतदार संघ हा अगोदरपासून राष्ट्रवादीच्या ताब्यात आहे. परंतु, शिवसेनेप्रमाणेच राष्ट्रवादी कॉग्रेसमध्ये फूट पडल्याने व या मतदार संघाचे विद्यमान आमदार चव्हाण हे आघाडीतील राष्ट्रवादीऐवजी महायुतीतील राष्ट्रवादीसोबत आहेत. त्यामुळे शिवसेना ठाकरे गटाने या मतदार संघात उमेदवार दिला आहे.
दिलीप घुगे यांनी उबाठाकडून उमेदवारी दाखल केली आहे. तर दुसरीकडे राष्ट्रवादी शरद पवार गटाकडून प्रतापसिंह पाटील यांनी उमेदवारी दाखल केली. त्यासोबतच उबाठाने माघार न घेतल्यास आम्ही मैत्रीपूर्ण लढतीच्या तयारीत असल्याचे संकेतही राष्ट्रवादीकडून देण्यात आले आहे.
दरम्यान, दुसरीकडे महायुतीत ही जागा राष्ट्रवादी काँग्रेसला सोडण्यात आली असली तरी भाजपचे एम. के. देशमुख यांनी बंडखोरी करीत उमेदवारी दाखल केली आहे. तसेच माघार घेण्यास देखील त्यांनी नकार दर्शविला आहे. त्यामुळे आज अर्ज मागे घेण्याच्या शेवटच्या दिवशीही देशमुख यांची उमेदवारी कायम राहणार की, त्यांची मनधरणी यश येणार यावरच चित्र ठरणार आहे. करण्यात भाजपला निवडणुकीचे पुढील चित्र ठरणार आहे.
