Railway and bus stations filled with passengers on the occasion of Diwali
छत्रपती संभाजीनगर, पुढारी वृत्तसेवा : नुकत्याच महाविद्यालय, शाळांना सुट्या लागल्या. त्यात दिवाळीचा सण त्यामुळे चाकरमान्यांसह नातेवाइकांकडे जाणाऱ्यांनी रेल्-वेस्थानकासह बसस्थानकावर एकच गर्दी केली आहे. अनेकांची तिकिटे कन्फर्म न झाल्याने उभ्याने प्रवास करण्याची वेळ आली आहे.
दिवाळीनिमित्त विविध मार्गांवर प्रवाशांची गर्दी वाढली आहे. चाकरमान्यांची आपापल्या गावी जाण्याची एकच धावपळ सुरू आहे. तर काहींनी नातेवाइकांकडे जाण्यासाठी एकच गर्दी केली आहे. त्यामुळे रेल्वेसह एसटी महामंडळाच्या बस हाऊसफुल्ल झाल्या आहेत.
येणारे ४ दिवस तरी सर्वच मार्गांवरील रेल्वेसह एसटी बस हाऊसफुल्ल असल्याची माहिती सूत्रांकडून मिळाली. दरम्यान, विविध मार्गांवरील रेल्वेचे एक महिन्यापूर्वीच अॅडव्हॉन्स बुकिंग संपले आहे.
ई-बसकडे ओढा
एसटी महामंडळानेही प्रवाशांना खासगी बसच्या तोडीसतोड सेवा देण्यासाठी गर्दीच्या मार्गावर ई- बससेवा दिली आहे. यात प्रमुख्याने पुणे मार्गावर जास्त भर दिला आहे. आरामदाई आणि वातानुकूलित बस असल्याने प्रवाशांचा ओढा ई-बसकडे वाढला आहे. त्यातल्या त्यात एसटी महामंडळाने दिवाळीची हंगामी दरवाढ रद्द केल्यानेही अनेकांचा ओढा एसटीकडे वाढला आहे.
जादा बसची व्यवस्था लांब पल्ल्यासोबतच जवळपासच्या गावांतूनही येणाऱ्या व तेथे जाणाऱ्या प्रवाशांचीही संख्या मोठ्या प्रमाणात असल्याने एसटी महामंडळाने जादा बसचे नियोजन केले आहे. एसटीप्रमाणेच रेल्वे प्रशासनानेही नांदेड-मुंबई मार्गावर जादा रेल्वेसह जादा डब्यांची व्यवस्था केली आहे. जादा डब्यांची व्यवस्था केली असली तरी बाहेरगावी जाणाऱ्या व शहरात येणाऱ्या प्रवाशांची संख्या मोठ्या प्रमाणात असल्याने सर्वच रेल्वे सध्यातरी हाऊसफुल्ल आहेत, अशी माहिती सूत्रांनी दिली.
