छत्रपती संभाजीनगर, पुढारी वृत्तसेवा : हंगाम सन २०२५-२६ मध्ये हमीभावाने कापूस व सोयाबीन, मका विक्री करण्यासाठी भारतीय कापूस निगम लिमिटेड यांनी कापूस उत्पादक शेतकऱ्यांना पूर्व नोंदणी करण्यासाठी किसान मोबाईल अॅप्लिकेशन सुविधा उपलब्ध करून दिली आहे.
तर सोयाबीन विक्रीसाठी ई-समृद्धी अॅपवर तर मका करिता स्वतंत्र लिंकवर नोंदणीची सुविधा उपलब्ध असून, शेतकऱ्यांनी नोंदणीसाठी अॅप सुविधेचा लाभ घ्यावा, असे आवाहन जिल्हाधिकारी दिलीप स्वामी यांनी केले आहे. यात सोमवारी (दि. १) प्रधान सचिव सहकार व पणन यांनी दुरदृष्य प्रणालीद्वारे आढावा घेतला. शेतकऱ्यांना आपला कापूस, सोयाबीन ही पिके हमी भावाने विकता यावी यासाठी ही सुविधा शासनाने उपलब्ध करुन दिली आहे.
त्यासाठी कापूस विक्रीसाठी कपास किसान अॅप तर सोयाबीन विक्रीसाठी ई समृद्धी या मोबाईल अॅपवर नोंदणी करता येणार आहे. दरम्यान, हमीभाव कापूस विक्री करण्यासाठी भारतीय कपास निगम लिमिटेड यांनी कापूस उत्पादक शेतकऱ्यांना पूर्व नोंदणी करण्यासाठी कपास किसान मोबाइल अॅप्लिकेशन तसेच सोसायटी नोंदणीसाठी ई-समृद्धी अॅपवर तसेच शेतकरी उत्पादक कंपनीमध्ये ऑनलाइन नोंदणी आवश्यक आहे, असे आवाहनाही जिल्हाधिकारी स्वामी यांनी केले आहे.
कापूस खरेदीसाठी ८ केंद्र
छत्रपती संभाजीनगर जिल्ह्यामध्ये ६ तालुक्यात (पाचोड व बालानगर, ता. पैठण, सिल्लोड, सोयगाव, शिऊर बाजार, ता. वैजापूर, खामगाव ता. फुलंब्री, गंगापूर व लासूर ता. गंगापूर) ०८ कापूस खरेदी केंद्रे आहेत.
सोयाबीन खरेदीसाठी केंद्र
छत्रपती संभाजीनगर, गंगापूर, वैजापूर, खुलदाबाद, कन्नड, सोयगाव, सिल्लोड, फुलंब्री व संत ज्ञानेश्वर कृषी सेवा सहकारी संस्था असे एकूण ०९ ठिकाणी तालुका शेतकरी सहकारी खरेदी-विक्री संघाचे सोयाबीन खरेदी केंद्र आहेत. छत्रपती संभाजीनगर जिल्ह्यातील किमान आधारभूत दरानुसार नोंदणीमार्फत हंगाम २०२५-२६ करिता सोसायटी विक्रेत्यासाठी कृषी उत्पन्न बाजार समिती सिल्लोड व आकाश अॅग्रो शेतकरी उत्पादक कंपनी असे एकूण दोन ठिकाणी सोयाबीन नोंदणी सुरू आहे.
मका खरेदीसाठी ११ केंद्र
छत्रपती संभाजीनगर, गंगापूर, लासूर स्टेशन, वैजापूर, खुलदाबाद, कन्नड, सोयगाव, सिल्लोड, फुलंब्री व संत ज्ञानेश्वर कृषी सेवा सहकारी संस्था, पाचोड व वीर महिला क्रांती शेतकरी कंपनी शिवना असे एकूण ११ ठिकाणी तालुका शेतकरी सहकारी खरेदी विक्री संघाचे मका खरेदी केंद्र आहेत. या ठिकाणी मका नोंदणी सुरू आहे.
