Job Fair167 unemployed individuals secured employment at the MIDC job fair
छत्रपती संभाजीनगर, पुढारी वृत्तसेवा : शेंद्रा एमआयडीसी येथील कौशल्य विकास केंद्रातर्फे मंगळवारी (दि.२८) घेण्यात आलेल्या रोजगार मेळाव्यात १६७विद्यार्थ्यांची जागेवरच निवड करण्यात आली. तर २४८ जणांना फेर मुलाखतीसाठी सहभागी २३ कंपन्यांकडून बोलावण्यात आले. जागेवरच नियुक्तीपत्र प्रदान करण्यात आले. मेळाव्यात ४१५ विद्यार्थी प्रत्यक्ष मुलाखतीसाठी उपस्थित होते.
कौशल्य एमआयडीसीच्या विकास केंद्रात आयोजित या रोजगार मेळाव्यासाठी प्रमुख अतिथी म्हणून शासकीय तंत्रनिकेतनचे प्राचार्य डॉ. ए.एम. जिंतूरकर, प्रा. अभय गिरी यांनी रोजगाराच्या संधी, कौशल्य विकासाचे महत्त्व याविषयी मार्गदर्शन केले.
या कौशल्य विकास केंद्राचे संचालक डॉ. जी.एम. वाघमारे यांनी सांगितले की, केंद्रामार्फत दर महिन्याला अशा रोजगार मेळाव्यांचे नियमित आयोजन करण्यात येते. या उपक्रमाला औद्योगिक क्षेत्रातील कंपन्यांचा मोठा प्रतिसाद मिळत असून युवक-युवतींना रोजगाराच्या संधी उपलब्ध करून देण्यात केंद्र महत्त्वाची भूमिका बजावत आहे. उद्योग जगताला लागणारे कुशल मनुष्यबळ आणि तरुण वर्ग यांच्यातील दुवा म्हणून हे व्यासपीठ प्रभावी ठरत आहे.
सामंजस्य करार
या मेळाव्यात कौशल्य विकास केंद्राने एका औद्योगिक कंपनीसोबत तसेच शासकीय तंत्रनिकेतन महाविद्यालयासोबत सामंजस्य करार (एमओयू) केला. याशिवाय आणखी ९ औद्योगिक कंपन्यांनी केंद्रासोबत सामंजस्य करार करण्याबाबत सकारात्मक भूमिका दर्शविली असून, लवकरच त्या संदर्भातील प्रक्रिया पूर्ण होणार आहे.
