बीड : शहराजवळ असलेल्या उखंडा तलावामध्ये बुडणाऱ्या मुलांना वाचवताना पित्याचा मृत्यू झाल्याची घटना शनिवारी दुपारी घडली. अग्निशामक दलाच्या जवानांनी मृतदेह तलावाबाहेर काढला. याप्रकरणी पाटोदा पोलीस ठाण्यात नोंद करण्यात आली आहे.
राजेंद्र वामन निर्मळ ( ४५, मुळगाव लिंबागणेश, हल्ली मुक्काम अंकुश नगर बीड) हे त्यांची पत्नी वैशाली निर्मळ, मेहुणी निशा, व मुले पियुष, आयुष आणि शुभम यांच्यासह बीड शहराजवळ असलेल्या खंडा तलावाच्या परिसरात पर्यटनासाठी गेले होते. यावेळी पियुष, आयुष व शुभम ही मुले तलावात पोहण्यासाठी उतरली होती. परंतु काही वेळातच त्यांचा आरडाओरडा ऐकू आल्याने राजेंद्र निर्मळ यांनी तिकडे धाव घेतली. परंतु ते मुलांकडे जात असताना मध्येच असलेल्या एका कोण खड्ड्यामध्ये बुडाले.
परिसरातील इतर लोकांनी या मुलांना वाचवले. परंतु तोपर्यंत राजेंद्र निर्मळ यांना वाचवता आले नाही. अग्निशामक दलाच्या जवानांनी घटनास्थळी दाखल होत निर्मळ यांचा मृतदेह तलावाच्या बाहेर काढला. याप्रकरणी पाटोदा पोलीस ठाण्यात नोंद करण्यात आली आहे.
