BMC Mayor Reservation 2026: राज्यात महापालिका निवडणुकांचे निकाल जाहीर झाले. आता महत्त्वाचा प्रश्न म्हणजे महापौरपद कोणाला मिळणार? त्याचं उत्तर आज मिळणार आहे. महाराष्ट्रातील 29 महानगरपालिकांमध्ये महापौरपदासाठी आरक्षणाची सोडत आज जाहीर होणार असून, मंत्रालयात सकाळपासूनच हालचालींना वेग आला आहे. ही सोडत आज सकाळी 11 वाजता मंत्रालयात काढली जाणार आहे. नगरविकास राज्यमंत्री माधुरी मिसाळ यांच्या उपस्थितीत ही प्रक्रिया होणार असल्याची माहिती आहे.
यंदा लागू झालेल्या 50 टक्के महिला आरक्षणामुळे राज्यातील 15 महापालिकांमध्ये महापौरपद महिलांसाठी राखीव राहणार आहे. तर उर्वरित 14 ठिकाणी महापौरपद सर्वसाधारण प्रवर्गासाठी राहणार आहे. म्हणजेच, अनेक शहरांत “महापौर कोण?” इतकाच प्रश्न नाही, तर “महापौर महिला असणार की पुरुष? कोणत्या प्रवर्गातून?” हेही आज स्पष्ट होणार आहे.
महिला आरक्षण जरी ठरलं असलं तरी, कुठल्या शहरात कोणत्या प्रकारचं आरक्षण लागेल हे सोडतीनंतरच कळणार आहे. माहितीनुसार—
काही महापालिकांमध्ये ओबीसी महिलांसाठी आरक्षण येऊ शकतं
काही ठिकाणी खुल्या प्रवर्गातील महिलांसाठी आरक्षण येण्याची शक्यता आहे
तसेच काही शहरांमध्ये अनुसूचित जाती-जमातीचे आरक्षण लागण्याचीही शक्यता आहे
मुंबईत महापौरपदासाठी आरक्षण कसं असेल, याकडे सगळ्यांचं लक्ष आहे. कारण मुंबईचा महापौर म्हणजे राजकीय सत्तेचं मोठं केंद्र मानलं जातं. मुंबईसाठी आरक्षण चक्राकार पद्धतीने काढलं जाणार आहे. म्हणजे मागच्या वेळच्या आरक्षणानंतर पुढचं आरक्षण बदलतं.
आरक्षण ठरल्यावर लगेचच सगळ्या पक्षांचं पुढचं काम सुरू होणार—
कोणत्या नगरसेवकाला महापौरपदाची संधी द्यायची?
कोणत्या शहरात कोणता चेहरा पुढे करायचा?
कुठे सहकार्य घ्यायचं? कुठे दबाव टाकायचा?
म्हणूनच आजची आरक्षण सोडत ही फक्त औपचारिक प्रक्रिया नाही, तर राज्यातल्या महापालिकांचं पुढचं राजकारण ठरवणारी घडामोड मानली जात आहे.
