शिरोळ : हरोली (ता.शिरोळ) येथे पाण्याच्या वादातून एकाचा धारदार शस्राने खून करण्यात आला तर एकजण या हल्ल्यात गंभीर जखमी झाला. ही घटना सोमवारी (दि.१९) सायंकाळी घडली. विजय एकनाथ मुघलखुडे (वय ४६, रा. हरोली ता. शिरोळ) असे खून झालेल्या तरूणाचे नाव आहे.
हल्लेखोरांनी धारदार शस्राने केलेल्या हल्ल्यात अजय कांबळे हा तरूणही गंभीर जखमी असून त्याच्यावर सांगली येथील सिव्हिल रुग्णालयात उपचार सुरू आहेत. याबाबतची नोंद रात्री उशिरापर्यंत शिरोळ पोलिसात झाली नव्हती. दरम्यान, ही घटना घडल्यानंतर काहींनी संशयित गुजरे याच्या घरावर दगडफेक केली अशी माहिती पोलिसांनी दिली. या घटनेनंतर हरोली गावात खळबळ माजली आहे. गावात तणावपूर्ण वातावरण बनले आहे. संशयित गुजरे याच्या घरासमोर पोलिस बंदोबस्त ठेवण्यात आला आहे.
