कुडाळ : कुडाळ तालुक्यातील सरंबळ सीमीदेव बसथांब्यानजीक दुचाकी व एसटी यांच्यात समोरासमोर झालेल्या अपघातात दुचाकीस्वार आयटी इंजिनिअर शुभम विठ्ठल परब (वय 26, रा. सरंबळ-देऊळवाडी) याला गंभीर दुखापत झाली. अपघातानंतर त्याला कुडाळ ग्रामीण रुग्णालयात आणले असता त्याचा उपचारादरम्यान मृत्यू झाला.
दरम्यान, या अपघातात रमेश शंकर दांडकर (55, रा. सरंबळ-साटमवाडी) यांना गंभीर दुखापत झाली असून त्यांच्यावर जिल्हा रूग्णालयात उपचार सुरू आहेत. हा अपघात गुरुवारी सकाळी 10.20 वा.घडला असून याप्रकरणी कुडाळ एसटी आगाराचे एसटी चालक विजय नारायण म्हाडगुत (37, रा. आंबेरी) यांच्यावर कुडाळ पोलिसात गुन्हा दाखल केला आहे.
कुडाळ आगाराची एसटी बस कुडाळ ते सरंबळ अशी बस चालक विजय नारायण म्हाडगुत हे घेवून जात होते. याचवेळी दुचाकीवरील युवक शुभम विठ्ठल परब हा रमेश दांडकर यांच्यासह सरंबळ येथून कुडाळच्या दिशेने आपल्या ताब्यातील ज्युपिटर दुचाकीने येत होता. यावेळी सरंबळ सीमीदेव बसस्टॉप नजीक ते आले असता एसटी बसची शुभम परबच्या दुचाकीला समोरून जोरदार धडक बसली. यामध्ये शुभम परबच्या डोक्याला गंभीर दुखापत झाली.जखमी अवस्थेतील शुभम परब व त्याच्या मागे असलेले रमेश दांडकर यांना तात्काळ कुडाळ ग्रामीण रूग्णालयात उपचारासाठी आणले. मात्र यावेळी उपचारा दरम्यान शुभम परबचा मृत्यू झाला. तर रमेश दांडकर यांना गंभीर दुखापत झाल्याने त्यांना अधिक उपचारासाठी जिल्हा रूग्णालय ओरोस येथे हलविण्यात आले. घटने दरम्यान या भागात मुसळधार पाऊस सुरू होता. त्यामुळे समोरून येणार्या दुचाकी स्वारचा बस चालकाला अंदाज न आल्याने हा अपघात घडला असावा, अशी माहिती घटनास्थळावरून मिळाली.अपघातात ज्युपिटर गाडीचा पूर्णतः चक्काचूर झाला. अपघातानंतर घटनास्थळावर मोठ्या प्रमाणात गर्दी झाली होती. घटनेची फिर्याद जयसिंग कृष्णा कदम (रा. सरंबळ-देऊळवाडी) यांनी कुडाळ पोलिसात दिली.त्यानुसार बस चालक विजय नारायण म्हाडगुत यांच्यावर पाऊस चालू असतानाही निष्काळजीपणे वाहन चालवून समोरून येणार्या ज्युपिटरला जोरदार ठोकर देवून दुचाकीस्वार शुभम परब याच्या मृत्यूस तसेच रमेश दांडकर यांच्या गंभीर दुखापतीस कारणीभूत ठरल्याप्रकरणी गुन्हा दाखल करण्यात आला आहे. अधिक तपास पोलिस उपनिरीक्षक गणेश कराडकर करत आहेत.
शुभम परब आयटी इंजिनिअर असून पुणे येथे एका खाजगी कंपनीत कामाला होता. अलिकडेच तो आपल्या गावी आला होता. त्याच्या पश्चात आई, वडील व बहीण असा परिवार आहे. शुभम घरातील एकुलता एक मुलगा असून तो घरातील एकमेव कमवता होता. मात्र काळाने घातलेल्या घाल्यात शुभमच्या कुटुंबावर दु:खाचा डोंगर कोसळला आहे. घटनास्थळी कुडाळ पोलिस स्टेशनचे कुडाळ पोलिस निरीक्षक श्री. मगदुम तसेच सहाय्यक पोलिस निरीक्षक श्री.पालवे,महिला पोलिस श्रीम म्हापसेकर, श्री. बुथेलो यांनी भेट देत पंचनामा केला.
