Nrusinhwadi Datt Paduka Krishnamai darshan
कुरुंदवाड: गेल्या काही दिवसांपासून पावसामुळे कृष्णा-पंचगंगा नद्यांच्या पातळीत झपाट्याने वाढ होत आहे. अखेर नृसिंहवाडी येथे भाविकांना अत्यंत प्रतीक्षित असलेला दक्षिण द्वार सोहळा आज (दि.२४) दुपारी दीड वाजण्याच्या सुमारास उत्साही वातावरणात संपन्न झाला. कृष्णा नदीने श्री दत्त महाराजांच्या मनोहर पादुकांचे दर्शन घेतले. या पवित्र क्षणाला साक्षी राहण्यासाठी मोठ्या संख्येने भाविकांनी उपस्थिती दर्शवली.
दक्षिण द्वार सोहळा हा नृसिंहवाडीतील वार्षिक धार्मिक परंपरेतील एक महत्त्वाचा सोहळा मानला जातो. कृष्णा नदीच्या पाणी पातळीने गाभाऱ्याच्या पायऱ्यांपर्यंत पोहोचल्याने दोन दिवसांपूर्वीच वातावरण पूजेसाठी अनुकूल झाले होते. मात्र, पाण्याच्या अनिश्चित पातळीमुळे सोहळा नेमका कधी पार पडेल, याबाबत साशंकता होती. अखेर आज दुपारी दीड वाजता पाण्याच्या योग्य पातळीने गाभाऱ्याला स्पर्श केल्याने मनोहर पादुकांचे कृष्णामाईने दर्शन घेतले आणि पारंपरिक रितीने दक्षिण द्वार सोहळा पार पडला.
तथापि, या नैसर्गिक आव्हानांच्या पार्श्वभूमीवरही दक्षिण द्वार सोहळा पार पडल्याने भाविकांमध्ये समाधानाचे व भक्तिभावाचे वातावरण आहे. कृष्णामाईने घेतलेले दर्शन भाविकांसाठी आशीर्वादासमान ठरले असून, सोहळा पाहण्यासाठी आलेले भाविक भावविभोर झाले आहेत.
