Khidrapur Kopeswar Temple Shravan Somvar update
कुरुंदवाड : श्रावण महिन्याच्या पहिल्या सोमवारी, शिरोळ तालुक्यातील ऐतिहासिक खिद्रापूर येथील कोपेश्वर मंदिर 'हर हर महादेव'च्या गजरात दुमदुमून गेले. भल्या पहाटेपासून सुरू झालेल्या पारंपरिक शिवमूठ व्रत आणि दुग्धाभिषेकाने संपूर्ण परिसर भक्तिमय झाला होता. मात्र, दुसरीकडे कृष्णा नदीला आलेल्या पुरामुळे राजापूर बंधारा पाण्याखाली गेल्याने कर्नाटकशी संपर्क तुटला, परिणामी दरवर्षीच्या तुलनेत भाविकांची गर्दी लक्षणीयरीत्या कमी असल्याचे चित्र दिसून आले.
श्रावणातील पहिल्या सोमवारची सुरुवात पहाटे मानद पुजारी रमेश जोशी आणि त्यांच्या कुटुंबीयांच्या हस्ते काकड आरतीने झाली. यानंतर, कोपेश्वर आणि धोपेश्वर शिवलिंगांवर भाविकांनी तांदळाची 'शिवमूठ' वाहून आपल्या व्रताची सुरुवात केली. दिवसभर दुग्धाभिषेक, जलाभिषेक आणि फुलांच्या आकर्षक सजावटीने महादेवाची पूजा करण्यात आली. महाराष्ट्र आणि कर्नाटकातून आलेल्या भाविकांच्या उपस्थितीने मंदिराला यात्रेचे स्वरूप आले होते, पण नेहमीची गर्दी यंदा दिसली नाही.
खिद्रापूरचे हे मंदिर केवळ एक शिवालय नसून, ते महादेव आणि विष्णू यांच्यातील अनोख्या नात्याचे प्रतीक आहे. पौराणिक कथेनुसार, दक्षकन्या सतीच्या विरहाने कोपलेले महादेव येथे येऊन बसले, म्हणून त्यांना 'कोपेश्वर' असे नाव मिळाले. त्यांचा राग शांत करण्यासाठी भगवान विष्णूंनी 'धोपेश्वर' रूप धारण करून त्यांचे सांत्वन केले. यामुळेच मंदिराच्या गर्भगृहात कोपेश्वर आणि धोपेश्वर अशा दोन शाळुंका आहेत. विशेष म्हणजे, कोपलेल्या महादेवामुळे या मंदिरात नंदी नाही, हे या मंदिराचे सर्वात मोठे वैशिष्ट्य मानले जाते.
दरवर्षी श्रावणी सोमवारी महाराष्ट्र आणि कर्नाटकातून लाखो भाविक कोपेश्वराच्या दर्शनासाठी येतात. मात्र, यंदा राजापूर बंधाऱ्यावर आलेल्या महापुरामुळे कर्नाटक राज्यातून खिद्रापूरकडे येणारा मार्ग पूर्णपणे बंद झाला आहे. त्यामुळे रविवारी रात्रीपासून जमणारी भाविकांची गर्दी यंदा दिसली नाही, ज्यामुळे अनेक भाविकांचा हिरमोड झाला. दरम्यान, मंदिर परिसरात कोणताही अनुचित प्रकार घडू नये यासाठी पोलीस प्रशासन आणि ग्रामपंचायतीने चोख बंदोबस्त ठेवला होता. भाविकांसाठी पिण्याच्या पाण्याची व वैद्यकीय सुविधांची सोय करण्यात आली आहे.
