Krishna Panchganga River Water Lifting Ban
कवठेगुलंद : पावसाने दडी मारल्याने उन्हाळ्याची तीव्रता वाढत असतानाच कृष्णा आणि पंचगंगा नद्यांवरील पाणी उपसा बंदीमुळे शिरोळ तालुक्यातील शेतकरी गंभीर अडचणीत सापडला आहे. नद्यांतील पाणीपातळी झपाट्याने खालावत असल्याने पाटबंधारे विभागाने सलग काही दिवसांसाठी उपसा बंदी लागू केली आहे. परिणामी, ऐन वाढीच्या टप्प्यावर असलेल्या पिकांना पाणी मिळत नसल्याने ती करपू लागली असून शेतकऱ्यांसमोर मोठे आर्थिक संकट उभे राहिले आहे.
शिरोळ तालुका ऊस, भाजीपाला आणि विविध नगदी पिकांसाठी प्रसिद्ध आहे. सध्या वाढत्या तापमानामुळे पिकांना नियमित पाण्याची आवश्यकता असताना उपसा बंदीमुळे सिंचन व्यवस्था विस्कळीत झाली आहे. पाण्याचे आवर्तन लांबल्याने उसाची पिके पिवळी पडू लागली आहेत, तर कोबी, मिरची, टोमॅटो आदी भाजीपाला पाण्याअभावी कोमेजत आहे. अनेक शेतकऱ्यांनी मोठा खर्च करून घेतलेली नवी लागवडही धोक्यात आली असून पिके जळून जाण्याची भीती व्यक्त केली जात आहे.
नद्यांमधील उपलब्ध पाणीसाठा मर्यादित असल्याने तसेच भविष्यात पिण्याच्या पाण्याची टंचाई निर्माण होऊ नये, यासाठी प्रशासनाने हा निर्णय घेतल्याचे सांगितले जात आहे. मात्र, या निर्णयाचा थेट फटका शेती क्षेत्राला बसत असून शेतकऱ्यांचे अर्थकारण कोलमडण्याची शक्यता निर्माण झाली आहे.
शेतकरी वर्गातून प्रशासनाकडे उपसा बंदीबाबत पुनर्विचार करण्याची मागणी होत आहे. सलग बंदी न ठेवता ठरावीक कालावधीसाठी पाणी उपलब्ध करून देण्याचे नियोजन करावे, तसेच पाण्याअभावी नुकसान झालेल्या पिकांचे पंचनामे करून तातडीने आर्थिक मदत द्यावी, अशी मागणी शेतकरी करत आहेत.
दरम्यान, शेतकरी संघटनांनीही या प्रश्नावर आक्रमक भूमिका घेतली असून प्रशासनाने त्वरित तोडगा न काढल्यास तीव्र आंदोलन छेडण्याचा इशारा दिला आहे. त्यामुळे सरकार आणि संबंधित यंत्रणा या समस्येवर कोणता मार्ग काढतात, याकडे संपूर्ण शिरोळ तालुक्याचे लक्ष लागून राहिले आहे.
