विशाळगड (प्रतिनिधी): शाहूवाडी तालुक्यातील गेळवडे येथील कासारी मध्यम प्रकल्पाच्या पाणीपातळीत यंदा चिंताजनक घट झाली आहे. कडाक्याचे ऊन आणि वाढत्या बाष्पीभवन वेगामुळे धरणात सध्या केवळ ०.८० टीएमसी (३२.९२ टक्के) पाणीसाठा शिल्लक राहिला आहे. गतवर्षीच्या तुलनेत हा साठा लक्षणीयरीत्या कमी असल्याने लाभक्षेत्रातील शेती आणि पिण्याच्या पाण्याचा प्रश्न गंभीर होण्याची चिन्हे आहेत.
पाणीसाठ्याची सद्यस्थिती:
कासारी प्रकल्पाची एकूण पाणी साठवण क्षमता २.७७ टीएमसी आहे. आजअखेर धरणाची पाणी पातळी ६०९.८० मीटरवर पोहोचली असून, एकूण उपयुक्त साठा २५.४८ दशलक्ष घनमीटर (०.८० टीएमसी) इतकाच मर्यादित राहिला आहे.
विशेष म्हणजे, गतवर्षी याच दिवशी धरणात ०.९३ टीएमसी साठा उपलब्ध होता. गेल्या वर्षी दमदार पावसामुळे धरण ओव्हरफ्लो झाले होते, मात्र यंदा पावसाची ओढ आणि वाढत्या उपशामुळे पाणी साठा वेगाने खाली जात आहे.
शेती आणि पिण्याच्या पाण्याचे संकट: कासारी नदीकाठच्या शेकडो गावांची तहान आणि हजारो एकर शेती या धरणावर अवलंबून आहे. उन्हाळ्याच्या तीव्रतेमुळे पिकांना पाण्याची मागणी वाढली असली, तरी धरणातील अल्प साठा पाहता सिंचनाच्या रोटेशनमध्ये कपात होण्याची दाट शक्यता आहे. जून महिन्याच्या अखेरपर्यंत, म्हणजेच पावसाळा सुरू होईपर्यंत हा साठा पुरवणे प्रशासनासमोर मोठे आव्हान ठरणार आहे.
प्रशासनाचा सतर्कतेचा इशारा:
पाणी टंचाईचे सावट गडद होत असल्याने धरण प्रशासनाने नागरिकांना सतर्कतेचा इशारा दिला आहे. "उपलब्ध पाणीसाठा पावसाळ्यापर्यंत पुरवण्यासाठी पाण्याचा अपव्यय तातडीने थांबवणे गरजेचे आहे. शेतीसाठी पाणी घेताना काटकसर करावी," असे आवाहन प्रशासनाकडून करण्यात आले आहे. जर मान्सून लांबणीवर पडला, तर ही पाणी टंचाई अधिक तीव्र होण्याची भीती व्यक्त केली जात आहे.
