कोल्हापूर-रत्नागिरी महामार्गावरील वाहतूक बंद: जुळेवाडी खिंडीत गॅस टँकर उलटला

विशाळगड: कोल्हापूर-रत्नागिरी राष्ट्रीय महामार्गावरील जुळेवाडी (ता. शाहूवाडी) खिंडीत रविवारी (दि ३) पहाटे गॅस टँकर पलटी झाला . टँकरमधून गॅस गळती झाल्यामुळे बांबवडे ते मलकापूर रस्ता वाहतुकीस पोलिसांनी बंद केला आहे. या अपघातात चालक जाऊल हक ( वय ३५, रा. झारखंड ) हा किरकोळ जखमी झाला आहे. टँकर ( के ए o१ ए एल ८३७९ ) रत्नागिरीहून गॅस भरून बेंगलोरकडे जात होता. जुळेवाडी खिंडीतील तीव्र वळणावर चालकाला वळणाचा अंदाज न आल्याने टँकर  पलटी झाला. या घटनेची नोंद शाहूवाडी पोलिसांत झाली आहे.

घटनेची माहिती मिळताच पोलीस निरीक्षक राजेंद्र सावंत्रे यांच्यासह शाहूवाडी पोलीस घटनास्थळी दाखल होऊन कोल्हापूर-रत्नागिरी महामार्गावरील बांबवडे ते मलकापूर दरम्यानची वाहतूक सुरक्षिततेच्या दृष्टीने बंद करून अन्य मार्गाने वळविण्यात आली. मलकापूर-शिरगाव-शिंपे-सरूड-बांबवडे मार्गे तसेच कोकरूड पूलावरून रत्नागिरीकडे वाहतूक वळविण्यात आली आहे. शाहूवाडी पोलिसांनी मलकापूर-बांबवडे येथे बंदोबस्त तैनात केला आहे.

दरम्यान, घटनास्थळी मलकापूर नगरपालिकेचा अग्निशामक बंब व १०८ रूग्णवाहिका तैनात केली आहे. शाहूवाडी पोलीस ठाण्याचे पोलीस निरीक्षक राजेंद्र सावंत्रे, पोलीस कॉन्स्टेबल संतोष पांडव, सुयश पाटील आदी पोलीस कर्मचारीमहामार्म वरून गस्त घालीत आहेत.

गॅस गळती रोखली, वाहतूक बंदच

टँकरमधून होणारी गळती रोखण्यास कोल्हापूर अग्निशमन दलाला यश आले आहे. टँकर रस्त्यावरून बाजूला घेण्याचे काम क्रेनच्या साहाय्याने सुरू आहे. पोलीस प्रशासनाच्या वतीने रात्रीच्या गॅस वाहतुकीवर निर्बंध घालण्यात येणार आहेत. सध्या धोका टळला आहे. पोलीस बंदोबस्त तैनात आहे. सुक्षिततेच्या दृष्टीने बांबवडे-मलकापूर दरम्यान रस्ता वाहतुकीस बंद ठेवण्यात आला आहे.
– राजेंद्र सावंत्रे, पोलीस निरीक्षक शाहूवाडी

हेही वाचा 

• कोल्हापूर : नागांव फाटा येथे ट्रेलरच्या धडकेत तरुण ठार तर एक जखमी
• कोल्हापूर: पन्हाळ गडावर जालना घटनेच्या निषेधार्थ मोर्चा
• कोल्हापूर: बांबवडे येथे मराठा समाजाचे रास्तारोको आंदोलन; फडणवीस यांच्या राजीनाम्याची मागणी