विशाळगड : पुढारी वृत्तसेवा : अनुस्कुरा – मलकापूर मार्गावरील चौथा मैल-माण (ता. शाहूवाडी) दरम्यानच्या घाटातील वळणावर चालकाचा वाहनांवरील ताबा सुटून इंडेन गॅसचा टँकर पलटी झाला आहे. या अपघातात चालक जागीच ठार झाल्याची प्राथमिक माहिती समोर आली आहे. खबरदारीचा उपाय म्हणून या मार्गावरील वाहतूक बंद करण्यात आली आहे. ही घटना शुक्रवारी रात्री घडली.
याबाबत पोलिसांतून मिळालेली अधिक माहिती अशी, शुक्रवारी रात्री अनुस्कुरा घाटमार्गे टँकर (एनएल ०१एन ६९७०) हा मलकापूरकडे येत होता. यावेळी चौथा मैल घाटाच्या खालच्या उताराच्या वळणावर चालकाचा वाहनांवरील ताबा सुटल्याने रस्त्याच्या पलीकडे जाऊन इंडेन गॅस टँकर पलटी झाला. यामध्ये चालक जागीच ठार झाला. तर वाहनाचे पुढील बाजूचे मोठे नुकसान झाले आहे. या घटनेची फिर्याद पेरिडचे पोलीस पाटील संतोष पाटील यांनी पोलिसांत दिली आहे. घटनेची माहिती मिळताच शाहूवाडी पोलिसांनी घटनास्थळी धाव घेतली. या अपघातात चालक केबिनच्या बाहेर फेकला गेला होता. त्याच्या छातीला जबर मार लागल्याने तो जागीच ठार झाला. मृतदेह मलकापूर येथील ग्रामीण रुग्णालयात नेण्यात आला. चालकाचे नाव समजू शकले नसल्याची माहिती शाहूवाडी पोलिसांनी दिली.
गॅस गळतीच्या भीतीने खबरदारी म्हणून या मार्गावरील वाहतूक पर्यायी मार्गाने वळविण्यात आली आहे. मार्गावरील परिसरातील दोन किलोमीटर परिसरामध्ये सतर्कतेचा इशारा देण्यात आला आहे. मलकापूर नगर परिषदेच्या अग्निशामक दलही येथे दाखल झाले आहे. शाहूवाडी पोलीस निरीक्षक प्रकाश गायकवाड यांच्या मार्गदर्शनाखाली अधिक तपास सहाय्यक पोलीस निरीक्षक शैलजा पाटील, पोलीस उपनिरीक्षक प्रसाद कोळपे यांच्यासह पोलीस कर्मचारी करत आहे.
हेही वाचा
